Ishte shpallur në kërkim për shitje droge, arrestohet 24-vjeçari në Tiranë

Një 24 vjeçar, i cili ishte shpallur në kërkim është arrestuar nga Policia e Tiranës.

Sipas policisë, i riu ishte shpallur në kërkim si pjesë e megaoperacionit të së shtunës, në kuadër të të cilit janë vënë në pranga 24 persona.

Ky shtetas ishte shpallur në kërkim pasi Gjykata e Shkallës së Parë e Juridiksionit të Përgjithshëm Tiranë i ka caktuar masën e sigurisë “Arrest në burg”, për veprën penale “Prodhimi dhe shitja e narkotikëve”.

Gjithsej nga ky operacion janë arrestuar 25 persona, të cilët akuzohen për shitje narkotikësh.

Njoftimi i policise

Megaoperacioni policor i koduar “Tempulli 4” vazhdon të japë rezultate në luftën ndaj krimit të organizuar dhe narkotikëve. Gjatë aksionit të fundit, u kap dhe u ndalua një tjetër person i shpallur në kërkim, duke e çuar numrin e të arrestuarve në 25.

Operacioni, i cili ka qenë në zhvillim për disa muaj, ka çuar në sekuestrimin e 1.8 kg kokainë, 18 kg marijuanë, 350 doza me lëndë të dyshuar narkotike sintetike ekstazi dhe LCD. Po ashtu, janë konfiskuar aparatet celulare dhe automjetet e përdorura nga individët e përfshirë në këtë aktivitet të jashtëligjshëm.

Ditën e djeshme, pas marrjes së informacionit të besueshëm mbi vendndodhjen e një personi të kërkuar, forcat policore kanë intensifikuar aksionet për lokalizimin dhe ndalimin e tij.

Si rezultat i këtyre përpjekjeve, në afërsi të Brrylit është kapur dhe ndaluar shtetasi O. V., 24 vjeç, banues në Tiranë. Ky individ ishte shpallur në kërkim pas vendosjes së masës së sigurisë “Arrest në burg” nga Gjykata e Shkallës së Parë e Juridiksionit të Përgjithshëm Tiranë për veprën penale “Prodhimi dhe shitja e narkotikëve”.