Ngjarja e tre viteve më parë mund të jetë shkak i atentatit që iu bë sot Aleksandër Sadikaj. Detaje të reja po zbulohen rreth të shkuarës së 27-vjecarit që humbi jetën sot në Sauk, pasi dyshohet se kanë lidhje me vrasjen e tij. Burime bëjnë me dije se Aleksandër Sadikaj, është përfshirë në një sherr me pasojë plagosjen e një personi tre vite më parë.
Konkretisht, ngjarja për të cilën Sadikaj është akuzuar ka ndodhur në Sarandë më 9 korrik 2019, kur ai në bashkëpunim me një person tjetër ka kryer një plagosje. Plagosja ka ndodhur në një plazh ne zonën pranë Kanalit të Çukës në Sarandë, ku ai ka qëlluar me thikë 3 herë në krah dhe gjoks një 40-vjeçar nga Vlora.
Ky i fundit gjatë transportimit për në spital u aksidentua edhe me makinë në vendin e quajtur “Kryqëzimi Mish-Peshkut”. Ditën e ngjarjes Aleksandër Sadikaj u shpall në kërkim nga policia, ndërsa më 30 korrik mori edhe masën e sigurisë në mungesë “Arrest në burg” nga Gjykata e Sarandës, por ende është e paqartë se si Prokuroria e qytetit bregdetar e ka mbyllur këtë dosje. I njohur ndryshe si ‘Aleksi i Memaliajt’, 27-vjeçari është person me precedent të theksuar kriminal, në fushën e vjedhjes, krimeve ndaj personit dhe narkotikëve, por aktualisht nuk ishte në kërkim.
Discussion about this post