Vendimi që pritet të japë Gjykata e Fierit për monstrën Klodian Çalamani, ka shkaktuar tensione në dyert e gjykatës, ndërsa prindërit e vogëlushit Mateo Vasiu dhe të afërm të tjerë kërkojnë drejtësi.
Pak më parë ata hynë me forcë në gjykatë, ndërsa u përplasën me punonjësit e policisë duke shkaktuar tensione. Mes dhimbjes dhe dëshpërimit, familjarët kanë shpërthyer dhe në drejtim të mediave, ku kanë thyer mikrofonat e disave prej ekraneve të pranishme.
Nëna e Mateos kërkon që autori të varet në mes të qytetit, ndërsa të afërm të tjerë i bëjnë thirrje banorëve të t’iu bashkohen për të parandaluar ngjarje të tilla.
“Jam nëna e djalit që më vranë. Kërkoj varje në mes të qytetit,” thotë nëna e vogëlushit 8-vjeçar.
Të afërm të tjerë kërkojnë drejtësi për Mateon e vogël. “Ne kërkojmë vetëm drejtësi. Sot ishte fëmija jonë, nesër mund të jetë i juaji. Fëmijët janë e ardhmja, nuk mund të vriten. Ku është drejtësia,” thonë të afërmit.
Mësohet se, autori Klodian Çalamani nuk ka mbërritur ende në Gjykatën e Fierit, dhe kjo skenë mund të sjellë edhe vonesën e nisjes së seancës. Masa e sigurisë për Çalamanin pritet të jepet në orën 10:30.
Discussion about this post