Gjykata e Posaçme kundër Korrupsionit dhe Krimit të Organizuar (GJKKO) ka pranuar kërkesën e avokatëve të Erzen Breçanit për të kryer ekspertizë mjekësore.
Ky vendim vjen pasi avokatët e tij prentedojnë se klienti i tyre ka probleme me zemrën dhe qëndrimi në qelinë e paraburgimit i rrezikon jetën.
Seanca e radhës u shty për ditën e premte, ku do paraqiten dy mjekët që do kryejne akt-ekspertimin.
Avokatët e Breçanit kërkojnë ndryshim të masës së sigurisë për shkak të gjendjes shëndetësore. Ndërkohë vetë Breçani ndodhet i shtruar në spitalin e burgut.
Kujtojmë se Breçani u arrestua pas zbërthimit të bisedave në aplikacionin “Sky”, ku rezultonte se ai diskutonte me eksponentë të krimit të organizuar, për disa ngjarje kriminale.
SPAK lëshoi 11 urdhër arreste ku u prangosën zyrtarë të lartë të policisë, ku mes të cilëve ishin Dedan Gjoni, shef i krimeve në komisariatin e Policisë numër 6, Erzen Breçani, ish-nëndrejtor i policisë së Tiranës, Bujar Ajezin dhe Besmir Murati.
Ata akuzohen për “pastrim parash”, “grup i strukturuar kriminal”, “trafik droge”, “sigurim kushtesh për të kryer vrasje”, “shpërdorim detyre” dhe “përkrahje të autorit të krimit”.
Discussion about this post