Kryeministri britanik Boris Johnson ka dalë sot në një deklaratë të fortë sa i përket tensioneve mes Rusisë dhe Ukrainës. Në fjalimin më të ashpër të mbajtur në Konferencën e Sigurisë në Mynih, Johnson tha që, nëse Rusia pushton Ukrainën atëherë do të tronditet e gjithë bota.
“Nëse dialogu dështon dhe Rusia zgjedh të përdorë dhunën kundër një popullsie të pafajshme dhe paqësore në Ukrainë dhe të shpërfillë normat e sjelljes së qytetëruar midis shteteve dhe të shpërfillë kartën e OKB-së, atëherë është në interesin tonë kolektiv që ti tregojmë Rusisë të kundërtën”, u shpreh ai.
Johnson paralajmëroi nëse Putin do të pushtonte Ukrainën lufta do të pasohej nga një periudhë e gjatë dhe e tmerrshme hakmarrjesh dhe kryengritjesh. “Prindërit rusë do të vajtojnë humbjen e fëmijëve, të cilët në mënyrën e tyre janë po aq të pafajshëm sa ata. Pas një brezi lirie në Ukrainë, ne tani po shikojmë një brez gjakderdhjeje dhe mjerimi. Besoj se Rusia nuk do të kishte asgjë për të fituar nga kjo aventurë katastrofike por ka shumë për të humbur”, tha ai. Ndërsa kërkoi nga të dy vendet që të ruajnë stabilitetin dhe të mos marrin hapa fatal.
Discussion about this post