Trajneri i Juventusit Massimiliano Allegri ka folur para mediave në prag të sfidës përballë Nantes, të vlefshme për fazën play-off të Europa League. Tekniku livornez i bardhezinjve, theksoi rëndësinë e rikthimeve nga dëmtimet të një pjese të rëndësishme të lojtarëve. Ai theksoi se formacionin ka për ta caktuar vetëm në mëngjesin e ditës së nesërme. Ai u ndal gjerë e gjatë te fakti se nëse Juve fiton Europa League-n, kualifikohet në Champions, prandaj skuadra do të jetë e motivuar 100% për të bërë sa më mirë.
“Përveç Pogba dhe Kaio Jorge, Cuadrado është rikuperuar edhe nëse nuk do të jetë 100 për qind, Bonucci do të thirret për të rikuperuar ndjesinë e lojës pranë ekipit: të tjerët janë të gjithë të grumbulluar.
Kam disa dyshime për formacionin, do të vendos në mëngjesin e ditës së ndeshjes. Është një përballje e dyfishtë, duhet pasur parasysh ky fakt. Ne duhet të përpiqemi që të arrijmë deri në fund sepse kjo është një derë që të dërgon në Champions League-n e sezonit tjetër.
Nuk është se ky kompeticion ndikon në të ardhmen time. Tani për tani ne jemi të përqendruar në të tashmen, i hedhim hapat një e nga një, ndeshje pas ndeshje: duhet të luftojmë nga tani e deri në fund, si në kampionat, në Europa League si dhe Kupën e Italisë”, deklaroi trajneri Allegri
Discussion about this post