Në mungesë të trajnerit Ilir Daja, Reinaldo Kalari drejtoi Partizaninin ndaj Egnatias ku kryeqytetasit nuk shkuan më shumë se barazimi 1-1. Pas ndeshjes zv trajneri i të kuqve analizoi performancën e skuadrës kryeqytetase duke theksuar:
“Ishim përgatitur për të fitoren, por për fatin tonë të keq. Si gjithmonë e nisim ndeshjen në disavantazh. U munduam të përmbysim gjithçka dhe morëm kontrollin e lojës. Krijuam raste shumë dhe shfrytëzuam të gjitha alternativat, megjithatë nuk finalizuam më shumë se një herë dhe ngecëm sërish.
Pasi pësuam golin, pamë që diçka nuk shkonte dhe ndryshuam edhe skemën, por në të ardhmen mbetet diçka për t’u vlerësuar se si do të rreshtohemi. Të them të drejtën ne kemi bërë shumë mirë në çdo ndeshje, pasi i kemi dominuar kundërshtarët, ndaj në këtë aspekt, jam i bindur që ata kanë dhënë gjithçka.
Edhe sot dhanë gjithçka për ta fituar ndeshjen, por bëhet fjalë për një ngërç psikologjik, pasi edhe sot e nisëm ndeshjen në disavantazh. Kalimi i ndeshjeve po e rëndon gjendjen psikologjike të lojtarëve, megjithatë jam i bindur që lojtarët do të vijojnë të japin maksimumin në fushë. Të gjithë bashkë duhet ta nxjerrim skuadrën nga situatë”, tha Kalari.
