Kalldrëmet karakteristike në zonën më të frekuentuar nga turistët siç është kalaja në Gjirokastër janë shkatërruar. Edhe një pjesë e gurëve e murit rrethues kanë rënë. Kështjella Argjiro është një nga më të mëdhatë në Ballkan. Po situata e infrastrukturës rreth saj lë shumë për të dëshiruar ku muret anësore janë të shkatërruara.
Sipas banorëve, fajin e kanë institucionet që lejojnë në këtë zonë të kalojnë mjetet të tonazhit të rëndë.
“Vendi ka bërë ulje atje nga betonierët ka ardhur kjo. Ka mbi 4 a 5 vjet që është shkatërruar. Është turp për ne që jemi Gjirokastritë. Më parë kjo pjesë ka qenë perlë,” – thotë një banor.
Një shkaktar tjetër është edhe erozioni gjithnjë e më shumë që po dëmton zonën.
Drejtoresha e Drejtorisë Rajonale të Trashëgimisë Kulturore në Gjirokastër, Pezana Rexha, thotë se në bashkëpunim me bashkinë do të ngrihet një taks-forcë për të gjithë zonën e kalasë. Kalaja Argjiro, e ndërtuar rreth shekullit të 12 është destinacioni kryesor në Gjirokastër i cili vizitohet nga turistet vendas apo edhe të huaj. Emri Argjiro është i lidhur me legjendën e një princeshe që u hodh nga kështjella me fëmijën e vogël në krah për t’u shpëtuar otomanëve.
