275 afganët që erdhën në Shqipëri ndodhen tashmë të strehuar në Durrës dhe në godinat e “Qytet Studentit” në Tiranë. Për mediat e ndryshme në vend, disa prej tyre janë shprehur se janë pritur shumë mirë në Shqipëri dhe se ndihet mirë që fëmijët e tij nuk janë më të rrezikuar.
“Udhëtimi nga Afganistani në Shqipëri ishte shumë komod, i shkëlqyer, na kanë mikpritur këtu. Të gjithë afganët që janë evakuuar shëndoshë e mirë në Shqipëri janë shumë të kënaqur me ardhjen këtu dhe moti është i mrekullueshëm. Shërbimi shumë i mirë, mikpritja fantastike. Kolegët tanë po përpiqen që qëndrimi ynë këtu të kalojë sa më mirë dhe pa incidente. Kam dëgjuar më para shumë për Shqipërinë kisha dashur të vijë, situata e vështirë në Afganistan na ka sjellë këtu, por gjithmonë kam dashur që ta vizitoja Shqipërinë, kam dëgjuar shumë fjalë të mira për Shqipërinë. Është ndjenjë e mirë kur sheh që fëmijët e tu nuk janë më të rrezikuar, sidomos duke marrë parasysh grupin që ka pushtuan vendin tim”, tha ai.
Ndër të tjera, ai shprehet se situata në Afganistan është e vështirë, dhe se sipas tij ndërkombëtarët duhet të reagojnë për të stabilizuar situatë.
“Situata atje është shumë e vështirë, njerëzit atje nuk e dinë se çfarë do bëhet me ta, e ardhmja është e paparashikueshme”. Për momentin atje nuk ka qeveri, nuk funksionojnë institucionet, progresi që bëmë në 20 vitet e fundit të ndihmuar dhe nga ndërkombëtarët, tashmë është në rrezik. Të gjithë afganët ndjehen se përfaqësitë ndërkombëtare duhet të reagojnë për të punuar me aktorët në rajon që të stabilizojnë situatën në Afganistan pasi është shumë e destabilizuar.
Sidomos ata që kanë punuar me organizata ndërkombëtare joqeveritare për 20 vitet e fundit, të rinjtë që janë përparuar dhe duan të jetojnë në paqe, janë shumë mendjehapur dhe kanë nevojë urgjente për ndërhyrje nga ndërkombëtarët dhe ndihmën e tyre, në mënyrë që Afganistani mos të kthehet mbrapsht në epokën e gurit. Kemi bërë progres shumë të mirë për 20 vitet e fundit dhe ky grup i dhunshëm po e destabilizon situatën. Unë punoja për qeverinë dhe gjithashtu për organizata ndërkomëbëtare, kam punuar në rajon të ndryshme”, shtoi afgani.
Mbrëmjen e djeshme mbërritën 154 qytetarë të tjerë afganë në dy fluturime nga Doha dhe Kabuli. Avioni i parë me 95 afganë nga Kabuli mbërriti në orën 22.45, ku u pritën nga ministja e Jashtme, Olta Xhaçka dhe ambasadorja, Yuri Kim. Grupi i dytë me 59 persona erdhën nga Doha në orën 01:00 pas mesnate, të cilët u pritën edhe nga kryeministri Rama.
