Drejtori i Përgjithshëm i Policisë së Shtetit, Muhamet Rrumbullaku, ka urdhëruar të gjithë drejtorët në 12 qarqet e vendit për të luftuar krimin e organizuar përmes identifikimit të autorëve të vendosjes së kamerave të sigurisë të paautorizuara nëpër hapësirat publike, në kundërshtim me ligjin.
Fiset Bajri e Lici
E para që ndërhyri për pastrimin e një pjese të kamerave ishte Policia e Shkodrës në zonat e fiseve Bajri dhe Lici, të cilat tashmë janë çmontuar dhe vijon hetimi për të zbardhur autorët që i kanë komanduar në distancë dhe serverat që i kanë ruajtur. Report Tv ka mësuar përmes burimeve se urdhri i kryepolicit Rrumbullaku për të gjitha drejtorit vendore të policisë është për të identifikuar kamerat e sigurisë që janë pa zot, që nuk janë në emër të askujt dhe nuk justifikojnë vendin e instalimit, në hapësira ku konsiderohen si vende me lëvizje të anëtarëve të grupeve kriminale.
Bashkitë
Ndihmë ndaj policisë për pikasjen dhe më pas për ndërhyrjen për çmontimin e këtyre kamerave është kërkuar edhe nga institucionet e bashkive, njësive administrative, kryepleqve apo administratorëve të pallateve, të cilët kanë kontaktin më të shpeshtë e më të afërt me qytetarët në vendet publike ku kamerat janë të vendosura. Në ditët në vijim mësohet se pritet të ketë operacione të tjera për çmontim kamerash që mendohet se janë vendosur për të monitoruar jo vetëm anëtarët kundërshtarë të krimit, por edhe efektivëve të policisë. Në fokus pritet të jenë qarqet Vlorë, Elbasan, Durrës, Tiranë dhe Fier, të konsideruara si pika të nxehta të krimit në vend.
Operacioni
Operacioni i Policisë së Shkodrës për çmontimin e 21 kamerave të vendosura në shtylla elektrike në ato që konsiderohen si bazat e fiseve që janë në konflikt me njëri-tjetrin prej shumë vitesh, ka çuar në shoqërimin e disa personave. Report Tv raportoi dje se shoqërime ka pasur si nga anëtarët e fisit Lici edhe Bajri, por asnjë prej tyre nuk kanë ndihmuar hetuesit në identifikimin e personave përgjegjës për vendosjen e këtyre kamerave. Pas marrjes në pyetje ata janë lënë të lirë, teksa po punohet për gjurmimin e serverit që ruan materialet filmike të këtyre kamerave të sigurisë.
Gjurmimi i tyre pritet të jetë i vështirë për shkak të cilësisë së avancuar. Përmes internetit, ato mund të komandohen edhe jashtë shtetit dhe për këtë arsye hetuesit po punojnë për të pasur rezultate. Rëndësia e gjetjes së këtyre serverëve është e madhe, për shkak edhe të mundësisë së sigurimit të provave për disa ngjarje kriminale që kanë ndodhur në këto zona në vitet e fundit, të mbetura të pazbardhura.
Discussion about this post