Forcat Renea kanë zhvilluar një aksion blic në Dibër për parandalimin dhe goditjen e veprimtarisë kriminale në fushën e narkotikëve dhe të armëmbajtjes pa leje.
Policia njofton se si pasojë e operacionit, në një lokal në Mat është goditur një rast i armëmbajtjes pa leje, ndërsa në Dibër, një rast i kultivimit të bimëve narkotike. Janë arrestuar në flagrancë 4 persona, si dhe janë sekuestruar 1 armë zjarri pistoletë, municion luftarak dhe lëndë narkotike cannabis.
Kështu, në një lokal në fshatin Urakë, Mat, është arrestuar në flagrancë D. N., 32 vjeç, banues në fshatin Bruç, Mat, pasi gjatë kontrollit, iu gjet e fshehur në trup një armë zjarri pistoletë me 6 fishekë.
Gjithashtu, janë arrestuar në flagrancë A. K., 16 vjeç dhe F. K., 27 vjeç (vëllezër) dhe F. K., 18 vjeç, banues në fshatin Grykë Nokë, Bashkia Dibër, pasi dyshohet se janë autorë të kultivimit të bimëve narkotike në këtë zonë.
Gjatë operacionit, shërbimet e policisë kanë sekuestruar një sasi lënde narkotike, si dhe kanë asgjësuar me anë të djegies pjesën tjetër të bimëve që ishin në proces tharjeje, ku një pjesë e tyre u sekuestrua në cilësinë e provës materiale.
Materialet i kaluan Prokurorisë pranë Gjykatës së Shkallës së Parë Dibër dhe Prokurorisë pranë Gjykatës së Shkallës së Parë Mat, për veprime të mëtejshme.
