Kryetari i Komisionit Hetimor për zgjedhjet e 25 Prillit, Enkelejd Alibeaj, ka dalë në një deklaratë për mediat pas dështimit të radhës të mbledhjes së Komisionit, pasi deputetët socialistë u larguan për herë të tretë.
Nga dalja e Kuvendit, Alibeaj e konsideroi strategji largimin e socialistëve dhe ndërprerjen e sinjalit, ndërsa tregoi me shumë rreth mbledhjes.
“Ikën prapë. E treta herë që ikin, pa arsye, pa shkak. Duket qartë me një strategji të demaskuar për të bojkotuar veprimtarinë e Komisionit. Kjo seli vendosi të ndërpresë edhe sinjalin televiziv që sipas traditës ndërpritet atëherë kur mbaron diskutimi. Kishim miratuar 16 nene. Në mënyrë të beftë u çuan dhe ikën dhe strategjia e tyre dukej qartë. Mbledhja e radhës ishte sot për në orën 11:00. Vazhduam me kërkesën për të hetuar veprimtarinë e patronazhistëve. Bardhi paraqiti të gjithë panoramën e plotë për patronazhistët. Çollaku parashtroi të dhënat për shpërdorimin e fondeve publike për të blerë votat e shqiptarëve. Bylykbashki foli për rindërtimin, zoti Xhaferraj për shpërdorimin e shumave të mëdha të shumave të shtetit për blerjen e votës. Salianji për punësimet. Punësime të përkohshme të bëra para 25 prillit”, tha Alibeaj.
Ai iu kundërpërgjigj edhe deputetes socialiste Blerina Xhylameti pasi kjo e fundit e konsideroi se po shkel ligjin.
“Përgjigja për Gjylametin është e thjeshtë: Unë drejtoj Komisionin bazuar në ligjin për Komisionet Hetimore ku thuhet fare qartë se rendi i ditës është i përcaktuar nga vetë ligjit. Plani hetimor paraprak ku qëndron edhe thembra e Akilit. Po e përsëris që e drejta për të thirrur dëshmitarë, pranohet edhe kur bëhet nga çdo deputet pa qenë nevoja për gjë tjetër. Mjafton kërkesa. Ndërsa këta nuk duan të lejojnë që të thirret si dëshmitar shtetasi Edi Rama”, tha ai.
Pas largimit të deputetëve socialistë, një incident ka ndodhur në sallën ku po zhvillohej mbledhja e Komisionit Hetimor, pasi punonjësja e administratës së Kuvendit, ka ndërhyrë duke kërkuar që mbledhja të përfundonte pasi nuk kishte kuptim të vijonte.
Kjo ka shkaktuar acarimin e situatës dhe Alibeaj ka kërkuar që garda e republikës të nxirrte nga salla punonjësen e administratës me pretendimin se po ndërpriste një mbledhje të rëndësishme dhe shtoi se për këtë çështje do të ndërmerreshin edhe veprime ligjore.
