Kaosi dhe pritjet e gjata në trafik janë bërë tashmë një rutinë e çdo të shtune në aksin Tiranë-Elbasan. Mesditën e kësaj fundjave, trafiku nga dalje e Tunelit të Krrabës deri në hyrje të Elbasanit është paralizuar për shkak të radhëve të gjata të makinave.
Pika më problematike mbetet “Hinka e Shijonit”, një segment që çdo fundjavë kthehet në pikën kryesore të ngërçit për qindra qytetarë që lëvizin drejt Juglindjes. Sot, trafiku u ngadalësua veçanërisht pranë rrethrrotullimit të Bradasheshit, vetëm pak kilometra nga qyteti, ku lëvizja u bë thuajse e pamundur për më shumë se një orë.
Shkaku kryesor është fluksi i madh i automjeteve që largohen nga Tirana drejt qyteteve të tjera për fundjavë, ndërsa autoritetet nuk kanë ende një strategji konkrete për menaxhimin e situatës.
Drejtuesit e mjeteve janë këshilluar të tregojnë durim dhe të ndjekin udhëzimet e policisë, por pyetja mbetet: sa kohë do të vazhdojë ky bllokim i përhershëm pa zgjidhje reale?
Discussion about this post