Eksperti i kriminalistikës, Ervin Karamuço ka zbuluar se në automjetin e Aleksandër Sadikajt, i cili humbi jetën gjatë atentatit me eksploziv, ishte vendosur C4. Karamuço tha se për vendosjen e eksplozivit duhet një ekspert i vërtetë, që zakonisht janë të jashtëm. “Ekspertët për C4 i gjen rrallë në Shqipëri dhe këta ose kanë marrë trajnim, ose kanë gjetur ekspertë të huaj për ta vendosur.”
Në këto raste, shpjegon Karamuço në afërsi të vendit të ngjarjes ka dhe persona që rrinë pasi është kryer “porosia” dhe shohin veprimet e policisë.
“Shohin veprimet që po kryen policia dhe informojnë autorët për ndonjë gabim, gjurmë.”
Sipas ekspertit, nëse sasia e lëndës plasëse do të kishte qenë më e madhe, do të kishim të bënim me një akt terrorist.
Gjatë atentatit Sadikaj, mori plagë të rënda në trup, humbi gjymtyrët (këmbët) dhe nuk mundi t’i mbijetojë hemorragjisë në spital. 27-vjeçari po udhëtonte me mjetin e llojit tip “Golf” në momentin që lënda plasëse ishte e vendosur në pjesën e parme të makinës që u hodh në erë me 150 gramë tritol. Makina shpërtheu ndërsa ishte në lëvizje e sipër, ndërsa dyshohet se autorët e hodhën në erë me telekomandë në distancë mjetin. Ndërkaq policia, si pistë kryesore ka të shkuarën e errët kriminale të viktimës së atentatit.
Discussion about this post