Në çdo fillim viti bashkitë fillojnë e blejnë karburant se iu duhet për makinat e stafit dhe të shërbimeve. Shumicën e tenderave i fiton “Kastrati”, që ka mbërthyer bashkitë dhe institucionet e tjera. Pra, nuk ka surprizë në vendimin e kryetares së Bashkisë Klos, Valbona Kola, e cila ia ka xhiruar paratë oligarkut të naftës.
Më datë 5 mars 2024, bashkia Klos hapur një tender me numër reference REF-97238-03-04-2024 dhe objekt ‘Blerje Karburanti (Naftë + Benzinë)’.
Konkretisht do të blihen 530 litra benzinë dhe 159,570 litra naftë. Pse duhet kaq shumë naftë për një bashki të vogël sa e Klosit? Sigurisht që harxhohet, për rrugën shtëpi-zyrë, fundjavat larg Klosit, por edhe për ndonjë shërbim apo punë. Këto blerje bashkia i bën çdo vit, por pa dhënë shpjegime për sa makina përdoret ky karburant, sa kilometra do të kryejnë dhe pa përpiluar në fund një raport se sa orë janë shfrytëzuar në lëvizje këto makina. As në dokumentet standarde të tenderit nuk përcaktohet numri i personelit që pajisen me kartë për t’u furnizuar me karburant në pikat e “Kastrati-t”.
Siç shohim, deri në vitin 2021 vetëm 3 makina janë për përdorim të përditshëm, por edhe nëse do të shtojmë këtu ato makina që përdoren për punë, edhe pse zakonisht hapet tender më vete, rezultojnë 12 automjete.
Ndërkohë as në vitin 2022 dhe as në vitin 2023 nuk ka patur blerje të automjeteve të reja.
Pra 250 milionë lekë karburant për 3 makina që mbeten në përdorim të përdorim të përditshëm. Por edhe sikur të lëviznin 12 mjete, nuk mund të harxhojnë kaq shumë naftë.
Ky prokurim përveç fondit limit të paargumentuar, përmban edhe shkelje të tjera. Deri në më datë 21 mars 2024, kur ka qenë afati i fundit i paraqitjes së ofertave, kanë shfaqur interes dy firma: Kastrati” Sh.p.k dhe “MEND OIL” Sh.p.k. Kjo e fundit është përjashtuar nga pjesëmarrja me argumentin se nuk ka dorëzuar vërtetimin që tregon se ka shlyer taksat për vitin 2023.
Kur në fakt ligji parashikon që Autoriteti Kontraktor duhet t’i njoftojë konkurrentet për këto mungesa dhe t’iu lërë disa ditë kohë që ata t’i dorëzojnë. Në fakt edhe vetë Tatimet i presin bilancet e vitit 2023 të dorëzohen deri në 31 mars 2024. Por Kola e ka syrin nga “Kastrati”, sepse ky është pjesa kryesore e oligopolit në këtë treg, ndërkohë që ka mbështetjen politike të qeverisë qendrore. Pra, Kola nuk ka pse prishet me Kastratin!
Open Data e ka vlerësuar këtë tender me “Flamur të kuq” për riskun e korrupsionit.
Nga ana tjetër, oferta e Kastrati ishte 250 milionë lekë, pra sa 100% e fondit limit dhe pavarësisht kësaj u shpall fitues pa u zhvilluar një garë e rregullt.
Epo, Kola nuk i bie lapsit se sa familje të varfra të bashkisë së saj mund të paguhen me ndihmë ekonomike, nëse kursehet të paktën 100 milionë lekë nga këto që i shkojnë Kastratit.
Dhe për ta mbyllur, shtrojmë një pyetje: A ka kryetarja e bashkisë Klos të dhëna se vitin tjetër do të ketë krizë botërore të naftës? Me siguri stafi i saj ka parashikuar ndonjë katastrofë globale ose luftë botërore, prandaj me këtë tender blerja përfshihet në kontratë 2-vjeçare!
Discussion about this post