Më 20 qershor do të mbahet në GJKKO, seanca gjyqësore për kërkesën e presidentit të Partisë së Lirisë, Ilir Meta për ndryshimin e masës së sigurisë. Seanca do të mbahet në orën 11:30 dhe do të drejtohet nga gjyqtari i hetimit paraprak, Erjon Çaça.
Meta, ndodhet në paraburgim që prej 21 tetorit 2024, kërkon zëvendësimin e masës “arrest në burg” me një masë sigurie më të butë. Avokatët e tij argumentojnë se janë shkelur afatet procedurale, pasi kanë kaluar mbi tetë muaj nga vendosja e masës pa u paraqitur ndonjë informacion dy mujor nga SPAK, siç parashikohet nga ligji.
Në kërkesën e depozituar pranë gjykatës, mbrojtja e Metës ka përfshirë edhe disa vendime të Gjykatës Evropiane për të Drejtat e Njeriut duke përmendur raste analoge, përfshirë edhe çështjen “Gëllçi”, si precedentë për interpretimin e të drejtave të të paraburgosurve dhe afateve të qëndrimit në paraburgim.
Kujtojmë që më 27 maj, SPAK mori zyrtarisht të pandehur Ilir Metën dhe ish-bashkëshorten e tij, Monika Kryemadhi me akuzat e korrupsionit, pastrimit të parave dhe fshehjes së pasurisë. Bëhet fjalë për tre hetime të përfshira në një dosje, afera CEZ-DIA, skandali i lobimit të LSI në SHBA dhe hetimi pasuror.
Discussion about this post