Oligarku Behar Çukaj i ka marrë me radhë tenderat e bashkive të jugut për furnizimet me karburant, ku është duke u favorizuar nga zyrtarët. Edhe bashkitë si ajo e Këlcyrës është në axhendën e Behar Çukajt. Kryetari i bashkisë, Klement Ndoni, ka zhvilluar se fundmi një tender me objekt ‘Karburant për automjetet’. Ndoni nuk ka raportuar se sa mjete janë në përdorim, por vetëm përshkruan fondin limit 51 milionë lekë për të blerë naftë.
Procedura ishte e hapur deri më 18 qershor 2024, pra vetëm 10 ditë. Në përmbyllje të tenderit vihet re se “O L S I” SHPK e Behar Çukajt, ishte e vetmja kompani pjesëmarrëse. Me sa duket, Kastrati dhe Gega ia kanë lënë të lirë këtë zonë.
Në dokumente nënvizojmë ofertën e tij që është 51 milionë lekë, pra sa 100% e fondit limit. Pavarësisht se kjo përbën një shkelje, Ndoni ka vazhduar me procedurën dhe e ka shpallur fitues firmën “OLSI”.
Ndërkohë Open Data Albania i ka vendosur tenderit “Flamurin e Kuq” për të treguar riskun e korrupsionit.
Në çdo vit Bashkia Këlcyrë nuk harron të sigurojë naftë për makinat e stafit dhe ato pak shërbime që kryhen. Ndërkohë vëmë re që përveç faktit se tenderët jepen pa garë, por bashkia nuk mbledh as taksat që kanë si detyrim kompanitë e karburanteve.
Pra qytetarëve u rritet çmimi i naftës, ndërsa kompanitë në Këlcyrë nuk paguajnë as taksat.
“Nga auditimi u konstatua se për katër subjekte të cilët zhvillojnë aktivitetin e tregtimit me pakicë të karburanteve, gazit të lëngshëm të naftës, për automjetet, vajrave lubrifikante dhe lëndëve djegëse për përdorim nga konsumatorët fundorë, nga Bashkia Këlcyrë nuk është aplikuar tarifa për paisje me autorizim për zhvillimin e aktivitetit të mësipërm. Nga këto veprime në total është krijuar një e ardhur e munguar në vlerën 8,000,000 lekë”, thuhet në një dokument të publikuar nga KLSH në fund te dhjetorit 2023.
Epo në këtë bashki të vogël pazaret e naftës qenkan të mëdha. Sidoqoftë, si në rastin kur zhvillohen tenderë pa garë për naftën e bashkisë, edhe kur tolerohen të mos paguajnë taksa kompanitë që shesin karburante, barra sigurisht bie mbi qytetarët.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post