Kolegji i Posaçëm i Apelimit zhvilloi sot seancën për shpalljen e vendimit të subjektit të rivlerësimit Lindita Male. KPA pasi analizoi provat dhe faktet vendosi të lërë në fuqi vendimin e KPK për konfirmimin në detyrë të prokurores Lindita Male (Ziguri).
Kujtojmë se ishte Komisioneri Publik ai i cili apeloi vendimin e KPK të marrë në 12 janar të këtij viti, pasi pretendonte që Male ka kryer deklarim të pamjaftueshëm dhe të pasaktë për kontrollin e pasurisë dhe ka cenuar besimin e publikut te sistemi i drejtësisë. Komisioneri Publik i kërkoi Kolegjit të vendos ndryshimin e vendimit të Komisionit të Pavarur të Kualifikimit dhe shkarkimin nga detyra të subjektit të rivlerësimit.
Prokurorja Lindita Male (Ziguri) kundërshtoi shkaqet e ankimit të Komisionerit Publik, duke deklaruar se gjatë procesit në Kolegj, ka arritur të provojë të kundërtën e ankimit bazuar në ligj, nëpërmjet provave bindëse dhe shteruese. Subjekti i rivlerësimit i kërkoi Kolegjit lënien në fuqi të vendimit të Komisionit të Pavarur të Kualifikimit.
Lindita Ziguri (Male) e ka filluar karrierën në sistemin e drejtësisë në vitin 2002 dhe ka punuar për më shumë se një dekadë si prokurore në Prokurorinë e Tiranës. Në dhjetor 2020, Ziguri u komandua si inspektore në institucionin e Inspektorit të Lartë të Drejtësisë nga Këshilli i Lartë i Prokurorisë.
Discussion about this post