Komuniteti shqiptar në Greqi është ngritur sot në sheshin “Klauthmones” në kërkim të njohjes së kontributeve të tyre. Në një deklaratë për mediet ata tregojnë se, kërkesa e tyre parësorë është që shfuqizohet ligji, i cili përcakton se duhen 40 vjet qëndrimi ne Greqi për te fituar pension. Është protesta e tretë që bëhet dhe për momentin qeveria Mitsotakis po rishikon kërkesën e tyre.
Sipas protestuesve, kjo është një padrejtësi dhe ata do të luftojnë derisa të marrin atë që meritojnë.
“Protestojnë nga gjithë Greqia. Është bërë një padrejtësi e madhe. E kanë pranuar edhe në Parlament që është bërë padrejtësi ndaj minoritarëve. Kjo padrejtësi duhet korrigjuar. Nuk duhet të kishte ndodhur. Jemi të edukuar me ligjin dhe jemi shumë në rregull me problemin e sigurimeve shoqërore. Na vjen mirë që kemi mbështetjen e vëllezërve tanë shqiptarë. Kërkojmë që të vihet dorë dhe të zgjidhet”, tha një protestues.
Një tjetër u shpreh besimplotë se Mitsotakis do ta mbajë fjalën për zgjidhjen e këtij problemi. Por edhe nëse nuk ndodh ata do të këmbëngulin për kërkesën e tyre.
“Po protestojnë për të drejtat e tyre në fushën e sigurimeve shoqërore. Padrejtësi që i bëhet shqiptarëve. Besojmë se Mistotakis do të mbajë fjalën e tij për të zgjidhur këtë problem. Edhe ne minoritarët jemi me të njëjtin nivel me shtetasit greke. Përpjekjet tona do të vazhdojnë deri në fund derisa të zgjidhet kjo padrejtësi”, tha ai.
Shqiptarët prej vitesh emigrojnë në Greqi, një pjesë e madhe jetojnë dhe punojnë në shtetin fqinj, por nuk iu paguhen kontributet shoqërore njësoj si punonjësit që janë shtetas grek.
