Delegacioni i eurodeputetëve të grupit Greens/EFA në Parlamentin Europian ka mbyllur misionin faktmbledhës në Shqipëri, ku në fokus kanë qenë çështjet e korrupsionit, shtetit të së drejtës dhe projektet në zonat e mbrojtura.
Gjatë konferencës për mediat në Europe House, eurodeputetja holandeze Tineke Strik u ndal te akuzat për korrupsion ndaj zyrtarëve të lartë shqiptarë, duke kërkuar që hetimet të zhvillohen pa ndërhyrje politike.
“Politikanët nuk duhet të mbrohen apo të pengojnë hetimet”, deklaroi Strik, duke theksuar se Bashkimi Europian duhet të ketë zero tolerancë ndaj korrupsionit dhe procedurave të dyshimta në prokurimet publike.
Deklarata e saj vjen në një kohë kur Prokuroria e Posaçme (SPAK) po zhvillon hetime ndaj zyrtarëve të lartë, ndërsa në skenën politike shqiptare vijojnë debatet lidhur me rastet e dyshuara të korrupsionit.
Eurodeputetja foli gjithashtu për protestat që po zhvillohen prej më shumë se një muaji në Tiranë, ku qytetarë dhe opozita kërkojnë ndryshime politike dhe dorëheqjen e kryeministrit Edi Rama.
Sipas Strik, mënyra se si autoritetet reagojnë ndaj protestave paqësore duhet të jetë në përputhje me standardet demokratike europiane dhe respektimin e të drejtave të qytetarëve.
Delegacioni i Greens/EFA zhvilloi takime me institucione shtetërore, organizata të shoqërisë civile dhe qytetarë, ndërsa një nga temat kryesore ishte edhe projekti turistik në zonën e mbrojtur të Vjosë-Nartës.
Eurodeputetët shprehën shqetësime në lidhje me ndikimin e këtij projekti mbi mjedisin dhe respektimin e standardeve të Bashkimit Europian për zonat e mbrojtura.
Discussion about this post