Konfindustria ka kërkuar nga Ministria e Financave që të shtyjë afatin e paraqitjes së pasqyrave financiare nga bizneset përtej datës 31 korrik të këtij viti. Shkak për këtë kërkesë nga Konfindustria janë bërë problematikat e mëdha elektronike të shkaktuara nga rënia e portalit qeveritar “e-Albania”. Sipas Konfindustrisë, bizneset po hasin probleme teknike dhe kjo krijon mangësi në raportim, çka më vonë mund të sjellë pasoja ligjore për ta. Kështu që në këtë rast më e mira është që raportimi i pasqyrave të shtyhet për një kohë tjetër, ku nuk do të ketë mangësi.
“Konfindustria, duke marre shkak nga rënia dhe problematikat e mëdha të platformës qeveritare elektronike e-albania, i kërkon Ministrisë së Financave dhe Ekonomisë të marri nismën ligjore për miratimin e Aktit Normativ për shtyrjen e afatit të paraqitjes së pasqyrave financiare të bizneseve përtej detyrimit të datës 31 korrik 2022. Mbështetur në të dhënat e ardhura pranë Konfindustrisë nga bizneset është plotësisht e pamundur teknikisht depozitimi i pasqyrave financiare. Në vazhdimësi në vite vështirësitë e paraqitjes në sistemet elektronike të e-albania ka qenë të pranishme dhe shqetësimet e biznesit kanë qenë të mëdha. Tashmë është krejtësisht e pamundur.
Në rast te mos shtyrjes së afatit ligjor të mësipërm me dhjetar mijëra biznese të vegjël, të mesëm dhe të mëdhenj me qarkullim mbi 5 milionë lekë të ardhura vjetore do të gjobiten automatikisht me 60 mijë lekë. Gjithçka më sipër ndodh pa asnjë shkelje nga ana e bizneseve, por përgjegjësi e plotë e platformave qeveritare elektronike.
Shqetësimi është shumë i pranishëm për efikasitetin e investimeve në ndërtimin e sistemeve të teknologjisë së informacionit në Shqipëri në vlera mbi 200 milionë $. Përveç problemeve të shumta teknike sistemi shqiptar i teknologjisë ka paraqitur dobësi të mëdha në mbrojtjen e informacionit të shtetasve, qeverisë dhe qytetarëve. Vetëm pak muaj më parë rrodhën informacione private të pagave, të targave të makinave dhe numrat e telefonit, që prekën qindra mijëra qytetarë dhe biznese”, thuhet në letër.
Kujtojmë se për gati një javë e-Albania u bllokua plotësisht pasi u sulmua nga hakerat, ndërsa tani janë në funksion vetëm disa shërbime.
Discussion about this post