Kryeministri i Kosovës, Albin Kurti, ka reaguar pas aksionit të Policisë së Kosovës në Zveçan ku është bastisur një depo armësh ku u sekuestruan një sasi e konsiderueshme armësh.
Sipas njoftimit të kryeministrit të pranishëm gjatë aksionit kanë qenë edhe pjesëtarë të KFOR-it.
Kurti ka thënë se armët janë përpjekur të shpërndahen te bandat e dhunshme në atë pjesë të Kosovës.
”Një tjetër fitore për shtetin ligjor dhe organet e sigurisë. Sot Policia e Kosovës në prani të trupave të KFOR-it bastisi një depo armësh në Zveçan që ishte përdorur për të kontrabanduar armë në Kosovë dhe për t’ua shpërndarë ato bandave të dhunshme. U konfiskuan armë ushtarake si pushkë automatike, granata dore dhe eksplozivë“, ka shkruar Kurti të martën.
Më parë, për këtë çështje kishte reaguar edhe ministri i Punëve të Brendshme, Xhelal Sveçla, i cili kishte dhënë detaje për aksionin.
”Deri më tani është zbuluar një sasi e madhe e armatimit, duke përfshirë armë automatike, fishekë, granata dore dhe eksploziv. Në vendin e ngjarjes, përveç institucioneve të sigurisë, kanë qenë të pranishëm edhe përfaqësues të KFOR-it. Veriu hap pas hapi po shkon drejt normalitetit. Rendi dhe ligji nuk do të cenohet në asnjë cep të Republikës”, ka shkruar ndër tjerash Sveçla.
Policia e Kosovës në një konferencë ka shprehur habinë e saj se ndër armët dhe municionet e konfiskuara kishte lloje të tilla që përdoren nga shtetet e NATO-s.
Policia tha se kjo çështje është interesante për t’u hetuar se si këto armë kanë rënë në duart e këtyre bandave.
Discussion about this post