Konflikti Sadushi-Llagami dërgohet për kompetencë në Gjykatën Kushtetuese

Konflikti gjyqësor ndërmjet Sokol Sadushit dhe Naureda Llagamit për emërimin e gjyqtarit kushtetues do të zhvendoset pikërisht para Gjykatës Kushtetuese.

Llagami, ish-kryetare e Këshillit të Lartë Gjyqësor, u shpall humbëse në votimin e kryer nga Mbledhja e Gjyqtarëve të Gjykatës së Lartë, pasi një votë vendimtare në favor të saj, u shpall e pavlefshme.

Naureda Llagami dorëzoi menjëherë një padi në Gjykatën Administrative të Apelit, ku kërkoi pezullimin e të gjithë procedurës së Mbledhjes dhe shqyrtimin e saj në themel, ku ajo pretendon se është shpallur humbëse padrejtësisht.

Padia e Llagamit u mor në shqyrtim mëngjesin e kësaj të Hëne (13 Tetor 2025) nga gjyqtarja Semiramis Hoxhalli.

Në përfundim të seancën paraprake, gjyqtarja konstatoi se padia nuk është kompetencë e Gjykatës Administrative të Apelit, por e Gjykatës Kushtetuese. Pra, pa marrë asnjë vendim mbi kërkimet e Naureda Llagamit, gjykata shpalli mos-kompetencën, duke ia përcjellë aktet Gjykatës Kushtetuese.

Gjyqtarja Hoxhalli ka konstatuar se vendimi i Mbledhjes së Gjyqtarëve për emërimin e një gjyqtari kushtetues nuk është akt juridiko-administrativ që shqyrtohet nga Gjykata Administrative e Apelit.

“Vendimi i Mbledhjes së Posaçme të Gjyqtarëve të Gjykatës së Lartë është një akt me natyrë juridiko-kushtetuese”, thotë në vendim gjyqtarja Hoxholli.

Ajo specifikon më tej se “vendimi i Mbledhjes së Posaçme përbën një funksion kushtetues të një organi që vepron në nivel të barabartë me Presidentin e Republikës dhe Kuvendin”.

Në këto kushte, gjykata Administrative e Apelit arrin në konkluzionin se “vetëm Gjykata Kushtetuese është kompetente për pazgjidhshmërinë e një gjyqtari të saj, papajtueshmërinë e mandatit apo vlefshmërinë e emërimit”.

Mbledhja e Posaçme e Gjyqtarëve të Gjykatës së Lartë emëroi pak ditë më parë Asim Vokshin si gjyqtarin e ri të Gjykatës Kushtetuese, i cili do të zëvendësojë anëtaren me mandat të përfunduar, Holta Zaçaj.

Vokshi mori 6 vota, ndërkohë që Llagami arriti të sigurojë tetë të tilla, por të pamjaftueshme për të siguruar kuorumin e nevojshëm. Në përfundim, Gjykata e Lartë vendosi që gjyqtari i ri kushtetues duhet të jetë Asim Vokshi, si kandidati i renditur i pari në listën e pikëzimit të Këshillit të Emërimeve në Drejtësi (KED).