Korrupsion me fondet e shtresave në nevojë. Kryebashkiaku i Cerrikut, Andis Salla, më 6 tetor 2023 ka firmosur një kontratë të dyshimtë për fondin e caktuar për komunitetin rom. Bëhet fjalë për tenderin me objekt “Përmirësim i banesave ekzistuese për komunitete te varfra dhe pa favorizuara”, kryesisht romët. Për këtë tender projekti ka parashikuar fondin limit 383 milionë lekë.
Siç del nga dokumentet që Gijotina.com i disponon, Salla ka preferuar të shkelë ligjin për prokurimet dhe të shpallë automatikisht fituese firmën e vetme që u paraqit në komisionin e vlerësimit. Kështu, në dokumentet e publikuara evidentojmë që tenderi është dhënë pa garë. “Z D R A V A” shpk është kompania që ka dërguar një ofertë me vlerë sa 89% e fondit limit. Në këto kushte gara duhej anuluar, por kryebashkiaku e kishte paracaktuar përfundimin e tenderit.
Për këto shkelje të mëdha, monitoruesi Open Data e ka shënuar tenderin me “Flamur të kuq”, duke treguar riskun e lartë të korrupsionit me fondin e prokuruar.
Dashnor Sinanaj, pronari i kësaj kompanie është në listën e preferuar të kryebashkiakëve. Kujtojmë se kompania ka përfituar një pjesë të madhe nga projekti i “5 Majit” në kryeqytet, Erion Veliaj prishi qindra shtëpi më vend të tyre po ndërton pallate.
Duke parë në foto gjendjen e shtëpive, mund të thuhet se është një hap i mirë që më në fund bashkia e Cerrikut u kujtua dhe për këtë komunitet. Por, nisur nga abuzimi me tenderin, nuk pritet që projekti të zbatohet ashtu siç është shkruar në letra.
Fondi për komunitetin rom dhe familjet e tjera në nevojë është bërë objekt i abuzimit edhe në bashki të tjera që kanë përfituar njëkohësisht. Në këto bashki vidhen lekët e projektit “përmirësimi i kushteve të jetës”, sikur së ndodh me rastin e Përrenjasit dhe së fundmi në Cërrik.
Disa muaj më parë u bë publike në media gjendja e komunitetit egjiptian në Cërrik, ku 107 banorë që banojnë në ish-ndërtesën e vjetër të shkollës “Tomor Sinani” kanë një banjë të përbashkët. Me prishjen e sistemit komunist 26 familje egjiptiane u sistemuan në këtë godinë ku vazhdojnë të jetojnë edhe sot në kushte të mjerueshme.
Familjet me shumë kurora ndahen nga njëra -tjetra me një çarçaf të vënë në mes, pasi jetojnë në një dhomë.
Para disa viteve u fol se në Cërrik do të ndërtoheshin 5 pallate për strehimin e të pastrehëve, më veçanti të egjiptianëve. Dhe plani parashikohej të vihej në zbatim gjatë viteve 2019-2022. Por nuk ndodhi. Në vend të pallateve u hodhën vetëm themelet të cilët mbeten gropa deri ditën e sotme.
Pak ditë më parë Gijotina.com denoncoi se si kreu i bashkisë Përrenjas abuzoi me tenderin 350 milionë lekë nga fondi që ishte përcaktuar për familjet rome dhe ato të varfra.
Lexo edhe: Bie qeveria e Malit te Zi, rrëzohet kabineti Zdravko Krivokapiç
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post