Kolegji i Posaçëm i Apelimit, KPA shpalli të mërkurën vendimin për lënien në fuqi të konfirmimit në detyrë të prokurorit të Tiranës, Arben Agovi, duke i konsideruar gjetjet në aspektin profesional të pamjaftueshme për të dërguar subjektin për trajnim njëvjeçar në Shkollën e Magjistraturës, ashtu si kërkoi drejtuesi i SPAK, Altin Dumani.
Arben Agovi u konfirmua në detyrë më 13 dhjetor 2023, por Komisionerja Publike, Irena Nino e ankimoi si të pabazuar vendimarrjen e shkallës së parë të vetingut, duke argumentuar se subjekti nuk arrinte nivel të besueshëm për shkak të problemeve të konstatuara në kriterin profesional dhe në vlerësimin tërësor të çështjes.
Nino kërkoi shkarkimin e Agovit, por pas paraqitjes së parashtrimeve nga palët, gjatë konkluzioneve përfundimtare drejtuesi i SPAK ndryshoi qëndrimin e tij, duke kërkuar detyrimin e Agovit për t’iu nënshtruar trajnimin njëvjeçar në Shkollën e Magjistraturës, pasi u konstatuan hetime të paplota në pesë çështje.
Ndërsa përfaqësuesi ligjor i subjektit, avokati Julian Mërtiri parashtroi se veprimet hetimore të kryera nga Agovi kanë qenë të plota, të detajuara dhe vendimatare për zgjidhjen e çështjes. Ai i cilësoi shkaqet e ngritura të pamjaftueshme për të cënuar konfirmimin në detyrë të subjektit.
Kolegji konstatoi gjatë shpalljet se vendimit, se pamundësia financiare është e një mase të tillë që nuk mund të sjelli penalizim. Po ashtu, disa prej gjetjeve në kriterin e profesionalizmit nuk u gjetën të mjaftueshme për të jusitifkuar detyrimin e prokurorit Agovi për t’u trajnuar një vit në Shkollën e Magjistraturës. Për rrjedhojë, u la në fuqi vendimarrja e Komisionit për konfirmimin në detyrë të këtij subjekti rivlerësimi./ BIRN
Discussion about this post