Komisioni i Prokurimit Publik anulon tenderin për biletat e parkimit tek spitali “Nënë Tereza”, që ishte organizuar nga Fondi Shqiptar i Zhvillimit. Kompania “Luar Bros” shpk ka bërë ankesë pranë Komisionit pasi dokumentet për tenderimin kanë kërkesa të cilat kufizojnë mundësitë e operatorit ekonomik për të garuar.
Tenderi me Nr. REF-22164-03-16-2022 me vlerë 20 milionë të vjetra ka disa parregullsi me mënyrën se si janë formuluar kriteret.
Sikur të mos mjaftonte fakti që shqiptarët duhet të paguajnë bileta për të hyrë me makinë në Qendrën Spitalore Universitare Nënë Tereza, përpos këtyre kostove duhet t’u shtohet fondi publik për letra për bileta ku nuk konstatohet abuzimi.
Natyrisht që ankesat nga kompanitë pjesëmarrëse ndodhin sepse dokumentacioni kopsitet në mënyrë të tillë që të skualifikojë konkurrentët nga gara për të ngelur në fund fituesi që është i paracaktuar nga ai që organizon tenderin, në këtë rast Agjencia Ekonomike Mbështetëse në varësi të Fondit Shqiptar të Zhvillimit.
Sipas Luar Bros shpk kërkesa e AEM-së për paraqitjen e 1000 (një mijë) mostrave për artikujt që prokurohen është një kërkesë e ekzagjeruar dhe shkon përtej asaj se çfarë është e nevojshme për realizimin e objektivit sepse testimi i produktit të kërkuar në pajisjet e zotëruara nga kompania mund të kryhet edhe me një sasi shumë më të vogël mostrash.
Ankesës së kompanisë Luar Bros shpk, Agjencia Ekonomike Mbështetëse i është përgjigjur duke thënë se argumentet janë të pabazuara dhe të pavërteta.
KPP-ja pasi ka marrë në konsideratë të dyja palët i ka dhënë të drejtë kompanisë që ka bërë ankesën duke rrëzuar AEM-në.
Gjithashtu Komisioni urdhëroi Agjencinë Ekonomike Mbështetëse të modifikojë dokumentet e tenderit sepse ato paraqesin kritere të cilat përbëjnë problem për kompanitë pjesëmarrëse.
Discussion about this post