Kredia për shtëpi po rritet me ritme të larta, jo vetëm në Tiranë, por edhe në qarqet e tjera të vendit.
Madje, në disa prej tyre, rritja e portofolit të kredisë është më e shpejtë se në Tiranë. Sipas Bankës së Shqipërisë, në mesin e këtij viti, ritmet më të larta të zgjerimit të kredisë për shtëpi u shënuan në qarkun e Vlorës, me 15.8% dhe në atë të Lezhës, me 15.1%. Kjo rritje mund të shpjegohet më së shumti me një rritje të investimit të individëve në pronat në bregdet.
Qarku i Tiranës u rendit i treti, me një zgjerim të portofolit të kredisë me 12.6%. Në rritje dyshifrore ishte kredia edhe në Qarkun e Fierit, me 10.3%. Vijojnë Qarku i Korçës me 6.7%, i Durrësit me 5.8%, Shkodra me 4.8% dhe Elbasani me 4.2%. Por, rritje akoma më e madhe është shënuar për pjesën tjetër të kredimarrësve, me rezidencë jashtë qarqeve kryesore të vendit. Në këtë segment të portofolit, rritja vjetore e portofolit të kredisë në mesin e këtij viti ka arritur në 30.6%.
Duke qenë se qarqet e mbetura kanë një zhvillim relativisht më të dobët në tregun e pronave, mund të supozohet se rritja e lartë në këtë segment ka ardhur sidomos prej jorezidentëve. Sipas vrojtimeve me agjentë të tregut dhe firmat e ndërtimit, jorezidentët po zënë një peshë në rritje në tregun e pronave dhe vlerësohet që më shumë se një e treta e transaksioneve kryhen nga jorezidentët. Këtu përfshihen emigrantët shqiptarë me banim jashtë vendit, por edhe shtetasit e huaj që blejnë pasuri të paluajtshme në Shqipëri, kryesisht në bregdet.
Në vlerë, Tirana vazhdon të dominojë tregun e pasurive të paluajtshme, me një vlerë portofoli aktive prej rreth 95 miliardë lekësh ose afërsisht sa 68.6% e portofolit total të kredisë për shtëpi. Kjo pjesë është në rënie krahasuar me një vit më parë, kur arriti në 69.5%. Por, sërish, shtesa e portofolit të kredisë në Tiranë, prej rreth 10.6 miliardë lekësh, ishte pothuajse dy herë më e madhe se shtesa në pjesën tjetër, të marrë së bashku. Kjo tregon se në volume financimi kryeqyteti vazhdon dukshëm të dominojë tregun e pasurive të paluajtshme.
Sipas Bankës së Shqipërisë, portofoli total i kredisë për pasuri të paluajtshme për individët në mesin e këtij viti arriti në 137 miliardë lekë ose 1.12 miliardë euro. Krahasuar me qershorin e vitit 2020, ky portofol është zgjeruar me 13.3%. Kjo rritje është rreth 2.3 herë më i lartë se zgjerimi mesatar i portofolit të kredisë për ekonominë për të njëjtën periudhë. Për 6-mujorin 2021, sektori bankar në vend ka disbursuar 19 miliardë lekë ose rreth 155 milionë euro kredi të reja për shtëpi, 88% më shumë krahasuar me të njëjtën periudhë të vitit të kaluar. /MONITOR
