Shëndetësia nuk prish zakonin e tenderave problematikë duke firmosur 12 kontrata me Devis shpk të cilat rezultojnë me flamur të kuq.
Kompania në fjalë është akuzuar më parë nga Partia Demokratike për lidhje me krimin e organizuar por edhe nga ish-kryeministri Berisha i cili ka shkëmbyer akuza nga rrjetet sociale me pronaren e kompanisë, Kristinka Leka.
Megjithëse Devis shpk nuk është midis kompanive me numrin më të lartë të kontratave, ajo renditet e para për shumën financiare të tenderave të përfituar që kapin vlerën e rreth 10.5 milionë eurove pa TVSH.
Burimi: openprocurement.al
Problemet nuk qëndrojnë tek numri i kontratave apo vlera e tyre por tek mënyra e prokurimit pasi pjesa më e madhe e tenderave janë me flamuj të kuq, një pjesë e tyre kanë mungesë konkurrence dhe në pjesën tjetër konkurrentët janë skualifikuar.
Madje, sipas të dhënave të nxjerra nga openprocurement.al rezulton se vlera totale e tenderëve me Red Flags për këtë kompani është rreth 1 miliard e 113 milionë lekë, ose thënë ndryshe, 85.6% e vlerës totale që Devis Shpk ka fituar nga tenderët në shëndetësi.
Prania e flamujve të kuq ose RedFlag është një fakt ose ngjarje që mund të tregojë një ekspozim dhe rrezik potencial për sjellje të paligjshme, veçanërisht në lidhje me praktikat korruptive.
Ligji shqiptar i lejon procedurat e prokurimit me një konkurrent të vetëm por shpesh këto procedura më shumë se mungesë konkurrence në treg shfaqin favorizim të një kompanie të paramenduar klienteliste. Këto tendera meritojnë të konsiderohen të ekspozuara dhe me risk sipas “openprocurement.al”.
Të shumtën e rasteve, ofertat fituese të Devis shpk janë sa 99% e vlerës limit dhe në dy raste oferta fituese është sa marrëveshja e fondit limit. Konkretisht tenderat për shërbimin e lavanderisë dhe hoteleri për maternitetin “Mbretëresha Geraldinë” dhe spitalin e Elbasanit “Xhafer Kongoli” përpos vlerës identike me fondin limit kanë dhe dy flamuj të kuq, një për skualifikimin e të gjithë operatorëve pjesëmarrës dhe një për procedurë me negocim duke përforcuar dyshimet për parregullsi në tenderim.
Shëndetësia kryeson sektorin e tenderave problematikë me 6927 me flamur të kuq dhe është vendosur shpesh në qendër të vëmendjes sidomos për tenderat sekretë gjatë pandemisë.
Raporti i fundit i Bankës Botërore thekson se “Shpenzimet për frymë për sistemet shëndetësore janë ndjeshëm më të ulëta se mesatarja e BE-së dhe mënyra me të cilën shpenzohen fondet e pakta është jo efikase ose jo e harmonizuar me profilin e sëmundshmërisë në rajon “.
Shpenzimi jo efikas i fondeve të shëndetësisë pasqyrohet dhe në raportin e fundit të KLSH-së për menaxhimin e situatës së Covid-19 në vendin tonë megjithatë tenderat e dyshimtë nuk ndalen./Gijotina.com/
Discussion about this post