Ndërsa Edi Rama po i dorëzon një e nga një vartësit, Dritan Agollin e ndan vetëm një fije nga prangat e SPAK. Fondi Shqiptar i Zhvillimit vazhdon të shpërdorojë paratë e buxhetit të shtetit në favor të oligarkëve.
Rasti i fundit është një përvetësim i madh dhe i hapur! Dritan Agolli dyfishon pagesat për fasada e riparime pallatesh në 4 rajone. Agolli në vend që të kërkonte respektimin e kontratave nga operatorët fitues që nuk kanë kryer punimet, u jep para të tjera.
Siç e theksuam, bëhet fjalë për ndërtime dhe rikonstruksione në rajonet 1, 2, 3 dhe 4. Këto kompani kanë firmosur 3 kontrata me vlerë 11 miliardë lekë në vitin që lamë pas. Dhe tani Agolli po u kep shpenzime shtesë për të cilat do të raportojmë një nga një më poshtë.
I pari është tenderi me objekt “Ndërhyrje rigjeneruese ne blloqet e banimit rigjenerimi i stokut të banesave në rajonin 1 dhe 2”, për të cilin në 6 korrik të vitit 2022 është firmosur fondi limit me vlerë 4.6 miliardë lekë.
Projektin për të bërë rikonstruksione në këto banesa e fitoi firma “Dion-Al” sh.p.k Shpresa Joanidhi. E cila në vitin 2019 është arrestuar për mashtrim me skemën e TVSH.
Por Shpresa nuk e ka harruar zakonin e vjetër.
Kështu, kompania e saj për këtë projekt ka marrë paratë, por punën nuk e ka përfunduar. Ndërkohë, FSHZH ka hapur dy tenderë të tjerë me objekt : “Ndërhyrje rigjeneruese ne blloqet e banimit, rigjenerimi i stokut të banesave në Rajonin 1 dhe 2., për të cilin është lënë në dispozicion fondi me vlerë 5.7 miliardë lekë.
Agolli ka shpallur për të njëjtët rajone edhe garën me objekt “Ndërhyrje për përmirësimin e shtresave asfaltike, Faza III, 2 Lote Rajonet 1 & 2”, për të cilin ka lënë në dispozicion fondin me vlerë 5 miliardë lekë.
Rajonet 3 dhe 4
Në vitin e shkuar Agolli firmosi dy tenderë me objekt “Ndërhyrje rigjeneruese në blloqet e banimit rigjenerimi i stokut të banesave në rajonin 3”. Si dhe “Ndërhyrje rigjeneruese në blloqet e banimit rigjenerimi i stokut të banesave në rajonin 4” me vlera përkatëse 3 miliardë dhe 2 miliardë lekë .
Tenderin për rajonin 3 e fituan firmat “Senka”sh.p.k & “Erzeni/SH” sh.p.k, të dyja të njohura për kontratat abuzive që përfitojnë në ndërtimin e rrugëve dhe nga procesi i rindërtimit pas tërmetit. “Senka” është kompania e Ylli Senkës, ndërsa “Erzeni” është me pronarë të panjohur dhe të paregjistruar në QKB.
Ndërsa tenderin për rajonin 4 e kanë fituar firmat “Modeste” shpk & “Arkonstudio” shpk , të cilat gjithashtu, si të gjithë operatorët më sipër xhiruan miliardat e tenderëve në 2022, por sot pas një viti nuk kanë përfunduar punimet. “Modeste” ka pronarë Refit Hysenin dhe Xhentil Kotobellin, ndërsa “Arkonstudio” është në pronësi të Erjon Kerrrit dhe Krenar Dilës.
Kështu, në buletin e datës 10 korrik 2023 të APP, Dritan Agolli ka regjistruar një tjetër tender.
Bëhet fjalë për tenderin me objekt “Ndërhyrje rigjeneruese ne blloqet e banimit, rigjenerimi i stokut të banesave në Rajonin 3&4. Për të cilin është vënë në dispozicion fond me vlerë 5.8 miliardë lekë.
Ndërsa fituesit do të shpallen në fund të këtij muaji. Nuk është çudi që këto para shtesë t’u jepen oligarkëve që vodhën fondet e para. Gjithsesi, SPAK duhet të marrë më seriozisht këto fonde që ikin në drejtim të paditur.
Fondi shqiptar i Zhvillimit është një institucion i krijuar nga ish-kryeministri Berisha dhe i përdorur mjeshtërisht nga pasuesi Rama. Si mekanizëm për të kontrolluar paratë që shpërndahen nëpër bashki duke u marrë kompetencat vendorëve. Me synim për të nxjerrë jashtë kontrollit këto fonde, qeveria ndërmori një hap tjetër në vitin 2020. Duke miratuar projektligjin që e ndan Shqipërinë në 4 rajone.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post