Kryeministri i Kosovës Albin Kurti në përfundim të takimit me Angela Merkelin në Tiranë u shpreh se kancelarja gjermane nuk i kërkoi që të përfshihet në nismën “Ballkani i Hapur”.
Ai u shpreh qartë dhe prerë se Prishtina nuk do të përfshihet në këtë iniciativë, pasi shtoi se Procesi i Berlinit është i mjaftueshëm për rrugën europiane.
“Unë nuk e di për çfarë tetori konspiracioni është fjala këtu. Është dashur ta pyesni. Unë nuk e di për çfarë teorie bëhet fjalë. Unë po jua tregoj qëndrimin tim, që e thashë edhe aty; Procesi i Berlinit është i nevojshëm dhe i mjaftueshëm për rrugëtimin europian dhe nuk ka nevojë për variante të tjera” – tha Kurti
Kurti gjithashtu iu përgjigj edhe Edi Ramës, i cili i kërkoi kreut të qeverisë së Kosovës që të lërë teoritë konspirative dhe të bëhet pjesë e “Ballkanit të Hapur”.
“Ballkani nuk është tre shtete, as 6 por të paktën 12 shtete. Pasnesër do të kemi një takim me qeverinë e Maqedonisë në Shkup dhe jemi për marrëdhënie të mira, por iniciativat në rajone nuk duhet të bëhen pa BE-në brenda. Dallimi mes Procesit të Berlinit dhe Ballkanit të Hapur është se në të dytën nuk e kemi BE-në” – është shprehur Kurti.
