Teksa Gjykata Kushtetuese ka nisur seancën e radhës për shkarkimin e tij, presidenti Ilir Meta ka shpërndarë në Facebook një postim referuar të dhënave të EUROSTAT për pagën minimale dhe rritjen e çmimeve.
Sipas këtyre të dhënave, kreu i shtetit thotë se ekonomia nuk mund t’iu lihet në dorë aventurierëve të cilët po e varfërojnë vendin. Ndër të tjera, Meta thotë se sipas të dhënave të EUROSTAT, familjet shqiptare po blejnë çdo produkt më shtrenjtë.
“Me nivelin më të ulët të pagës minimale krahasuar me vendet e rajonit, rritja e çmimeve në Shqipëri nuk ka të ndalur. Sipas të dhënave të EUROSTAT aktualisht, paga minimale në shkallë vendi është:
Në Shqipëri 248.4 Euro
Në Maqedoninë e Veriut 366.1 Euro
Në Serbi 401.4 Euro
Në Malin e Zi 532.5 Euro.
Ndërkohë nga fillimi i shkurtit 2022, çmimet e karburanteve në Shqipëri u rritën sërish me gati 8 lekë për litër, duke arritur nivele rekord, teksa po i afrohen 200 lekëve për litër. Në muajt e fundit të vitit 2021 dhe fillim të 2022, familjet shqiptare, përveç karburanteve, pothuajse çdo produkt po e blejnë më shtrenjtë”, shkruan Meta.
Ndërkohë, kujtojmë që në Gjykatën Kushtetuese po zhvillohet seanca e dytë për shkarkimin ose jo të Metës, ndërsa pritet që dhe sot të mos merret një vendim dhe agonia e Presidentit të zgjasë.
Discussion about this post