Kuvendi i Kosovës ka dështuar të zgjedhë nënkryetarin nga minoriteti serb edhe në mbledhjen e kësaj të shtunë (30 gusht). Dy deputetë e Listës Serbe, Miljana Nikolliq dhe Igor Simiq nuk morën asnjë votë në tri runde votimi secili. As deputeti tjetër nga ky komunitet, Nenad Rashiq, nuk arriti të zgjidhej, pasi mori 56 vota pro, pesë më pak se të paktën 61 votat e nevojshme.
Por edhe pse zgjedhja e nënkryetarit nga komuniteti serb dështoi, Kryetari Dimal Basha e konsideroi të mbyllur seancën konstituive, teksa thirri një mbledhje të kryesisë së Kuvendit për të hënën e 1 shtatorit.
“Në emër të funksionalizimit të Kuvendit dhe materializimit të rezultatit zgjedhor të 9 shkurtit, konsiderojnë se moszgjidhja e njërit prej gjashtë anëtarëve të kryesisë së Kuvendit nuk mund të bëhet pengesë që bllokon konstituimin e Kuvendit”, theksoi Basha.
Por pavarësisht se për Lëvizjen Vetëvendosje, fituesen e zgjedhjeve të shkurtit, Kuvendi i Kosovës është konstituuar, qëndrimi i tyre është kundërshtuar nga partitë e tjera parlamentare. Ata kanë paralajmëruar se nuk do të marrin pjesë në një mbledhje të tillë, pasi konsiderojnë se ende s’është përmbyllur konstituimi i Kuvendit të Kosovës.
Disa ditë më parë, Kuvendi zgjodhi kryetarin dhe katër nënkryetarët.
Discussion about this post