Gjykata e Janinës ka vendosur të rrëzojë kërkesën e autoriteteve shqiptare për ekstradimin e Laert Haxhisë.
Sipas vendimit, Haxhia do të qëndrojë në burg vetëm për akuzat largim nga vendi i aksidentit dhe prishje të qetësisë publike. Sipas tij në Shqipëri i rrezikohet jeta nga banda e Aldo Bares.
Vendimi është konfirmuar edhe nga avokati i Laert Haxhiut, Detar Hysi.
Ai u shpreh se beteja ligjore do vijojë në Apel deri në gjykatën e Lartë Greke.
“Vendimi është i drejtë, pasi në Shqipëri i rrezikohet jeta dhe është përndjekur sistematikisht nga shteti dhe personat kundërshtarë”, tha Hysi, sipas Oraneës. Pritet që në muajt në vijim gjykata e Apelit në Athinë të marrë në shqyrtim rastin e Laert Haxhiut, pasi prokuroria ka kërkuar apelimin e çështjes.
Në seancën e mëparshme, Laert Haxhiu ka refuzuar ekstradimin e tij në Shqipëri. Avokati i tij shqiptar, Detar Hysi ka deklaruar para gjykatës së Janinës se ekstradimi i tij Shqipëri, do i rrezikonte jetën për shkak të hasmërisë që familja e tij, ka me anëtarët e bandës së Aldo Bares. Avokatët kanë thënë se për shkak të hasmërisë, Gjermania ka miratuar kërkesën për statusin e azilantit politik nënës së Laertit, Florije Haxhiut dhe motrës Klea Haxhiu.
31-vjeçari u dërgua sot në një burg të sigurisë së Lartë në Greqi, në Koridhalos. Çështja do të shkojë në Këshillin kompetent të Apelit për të vendosur pro ose kundër ekstradimit të tij dhe më pas në Gjykatën e Lartë.
Laert Haxhiu dyshohet se është atentatori kryesor i ngjarjes së 11 shtatorit 2017, ku në qendër të qytetit u vranë Jurgen Hoxha dhe Zamir Latifit.
Haxhiu dyshohet se ka qenë edhe autori kryesor i plagosjes me pistoletë me 25 shtator të 2016-ës të Saimo Xheliut, ku po në të njëjtin vit ai ka tentuar që të ekzekutojë edhe nipin e Aldo Bares, Xhuljo Shkurti në qendër të Lushnjës. Ai është dënuar nga Gjykata e Lushnjës me 18 vite burg për vrasje të mbetur të tentative dosje, e cila është në Gjykatën e Lartë.
SPAK ia ka përcjelle materialet për 31-vjeçarin, Ministrisë së Drejtësisë ndërsa kjo e fundit përmes letërporosisë ia ka përcjellë shtetit grek.
Për masakrën e Lushnjës Gjykata e Posaçme ka dhënë dy burgime të përjetshme për Orges Bilbilin dhe Anterio Kaloshi, ndërsa është ende në proces gjyqi për Laert Haxhiun, i cili ishte shpallur në kërkim ndërsa jetonte ne shtetin Grek ku duket se ka krijuar edhe familje. Bashkë me Haxhiun, në momentin e arrestimit në automjet ndodheshin edhe shtetasit Firdeus Berberi, i shpallur në kërkim në 25 qershor 2022, për një atentat në Pogradec dhe Juxhin Barjami, i plagosur në vitin 2021 në një atentat në Athinë.
Discussion about this post