Një ditë pas aksidentit tragjik ku humbën jetën 5 persona në aksin rrugor Sarandë-Gjirokastër në afërsi të Dropullit, Gjykata ka lëshuar urdhër arresti për 22-vjecaren Rexhina Çelhaka, shoferen e mjetit tip Range Rover që dyshohet se është përplasur me furgonin ku ndodheshin mbi 6 pasagjerë dhe shoferi.
“Manovra e pastudiuar mirë e 22-vjeçares, ka shkaktuar aksidentin tragjik me 5 viktima, pasi furgoni për t’iu shmangur përplasjes ka dalë nga rruga dhe ka përfunduar 20 metra në humnerë. E reja ka pësuar shembje në krah dhe ndodhet në spitalin Rajonal të Gjirokastrës dhe është jashtë rrezikut për jetën”, tha në rrjetet sociale Harta Digitale e Aksidenteve Rrugore.
Çelhaka ka qenë duke udhëtuar së bashku me 2 shtetase të tjera italiane në automjet, Anna Cascavilla, 23 vjeçe, dhe Giulia Parimi, 22 vjeçe, të cilat po ashtu ndodhen në spital, jashtë rrezikut për jetën. Vajzat italiane në dëshminë e tyre të parë deklarojnë se ishte furgoni ai që mori kthesën gjerë dhe shoferja e foristradës frenoi për të shmangur përplasjen, ndërsa makina rrëshqiti nga lagështia.
“Furgoni e mori kthesën gjerë dhe shoqja jonë (drejtuesja e ‘Range Rover’ frenoi për të shmangur përplasjen, ndërsa makina rrëshqiti nga lagështia.”-mësohet se kanë dëshmuar vajzat.
Viktima të aksidentit ishin; Olesander dhe Tetiana Fediaieva, 53 dhe 48 vjeç, nga Ukraina, Bardhi Proda (shoferi) dhe çifti i bashkëshortëve, Fiqiri e Dritë Korçari. Fatmiresisht nga furgoni, i cili perfundoi ne humnere doli e gjalle Gerta Kaberdini, 25 vjece.
