Komisioni i Pavarur i Kualifikimit ka shkarkuar prokurorin Arjan Ndoj. Shkarkimi i prokurorit nuk ishte surprizë sepse herën e fundit që doli në Vetting, seanca ndaj Ndojës ka pasur shumë debate dhe qëndrime të forta nga ndërkombëtarët. Përfaqësuesi i ONM-së, Theo Jacobs, ka lëshuar kritika të forta ndaj prokurorit të Durrësit duke e kapur, pasi ky i fundit ka qenë më parë avokat dhe më pas është futur në organin e akuzës.
“Meqenëse kam te drejtën të ndaj opinionin tim me ju, kur përgatitesha për seancën po mendoja nëse do doja të kisha një prokuror si ju. Po ta them qartë: Jo ! Kur ju u rikthyet në 2008 mbasi ishit pezulluar për disa vite kam kontrolluar deklaratën tuaj dhe ju në atë kohë deklaronit se fitonit 250 mijë euro në vit si avokat. Nuk e di se sa gjyqtarë nga 2005 deri në 2007 fitonin po aq sa ju? Shumë gjyqtarë do të kishin qenë të lumtur nëse do fitonin sa ju. Unë pyes pse ky individ do dojë të jetë prokuror kur krahasuar me pagën e prokurorit që fitonte 1 të dhjetën që ju fitonit si avokat?”, tha përfaqësuesi i ONM.
Nga ana tjetër ai ka ironizuar dhe deklarata e prokurorit se e mori këtë detyrë për të luftuar krimin. “Ju thoni që u bëtë prokuror sepse donit t’i shërbenit vendit dhe doni të kapni kriminelë. E di nga ky proces , por ju nuk jeni një prej tyre. Arsyeja e dytë ju lëvizni nën shoqërinë e personave te gabuar dhe kjo nuk do të thotë që ka lidhje me hetimet tuaja, por sidomos në Shqipëri këta persona që nuk janë dënuar, kjo është një përgjigje në një kontekst shqiptar”, ka thënë ai më tej.
Nga ana e tij prokurori ka deklaruar se ka punuar fort që të marrë titullin e magjistrarit, ndërsa ka mohuar akuzat për pasurinë.
“Do bëj sqarim unë kam deklaruar 150 mijë euro të ardhura në vit si avokat dhe jo sa thatë ju. Titullin e magjistratit e kam fituar me shumë mund dhe djersë dhe u riktheva në punë pasi humbisja titullin për të cilin kisha luftuar gjithë jetën. Unë nuk u përkas revolucionarëve, por fakti që kam të ardhura të ligjshme është zgjidhja ime që u bëra prokuror. Ky koment që bëni ju sepse unë i plotësoj kushtet ligjore dokumentare për prokuror. Ndjej keqardhje kur thoni 60% e prokuroreve nuk i përmbushin kushtet. S’kam asnjë kompleks inferioriteti të përballem me Theo Jacobs në nivel ekspertize, përveç moshës”, tha prokurori.
Në 4 tetor 2019 ka rënë pre e një atentati me armë zjarri, nga ku mbeti i plagosur bashkë me një grua që e shoqëronte dhe të ‘tmerrshmin e Sukthit’, Landi Muharremin.
Ndoja është akuzuar publikisht nga zv.kryeministri Erion Braçe se punon për grupet kriminale në Durrës. Teksa ndodhej në qytetin e Durrësit ku mori pjesë në proçesin gjyqësor ndaj drejtorit të Kadastrës së Durrësit, Liridon Pula, i cili u arrestua për shpërdorim detyre, Braçe tha se Ndoj ka bërë presion mbi Pulën.
Gjithashtu gjatë seancës plenare të mbajtur më datë 3 tetor 2019, kryeministri Edi Rama, megjithëse pa i përmendur emrin, tha se “në Durrës është një prokuror që punon për grupet kriminale. Arrestojeni!”.
Discussion about this post