Presidenti i Partisë së Lirisë, Ilir Meta, do të vijojë të qëndrojë në burg. Gjykata e Posaçme rrëzoi kërkesën e tij për të zëvendësuar masën e sigurisë dhe lirimin nga paraburgimi, ku qëndron prej tetorit të vitit të kaluar.
Në kërkesën e depozituar javën e kaluar në gjykatë nga avokati, Meta e motivonte zëvendësimin e masës me faktin se në 8 muaj SPAK nuk kishte bërë raportimet periodike 2-mujore në gjykatës dhe se ai ishte numri 2 i opozitës në vend.
Ndërkohë, burime pranë SPAK bënë me dije se hetimi ka zbuluar edhe një kartë bankare, të vënë në dispozicion nga një biznesmen, që dyshohet të jetë përdorur nga ish-bashkëshortët Meta-Kryemadhi.
Pas seancës, avokati i Metës u ndal në një prononcim për gazetarët jashtë gjykatës, duke u shprehur se prokuroria ka shkelur procedurat ligjore, pasi nuk ka zhvilluar të paktën katër seanca të informimit mbi ecurinë e hetimeve çdo dy muaj.
Sipas tij, “vendimi ishte i pritshëm”, sepse edhe arrestimi ka qenë sipas avokatit një arrestim politik.
“Ne nuk prisnim ndryshim të masës së sigurimit, sepse ne jemi të bidnur, që zoti Meta është aty për arsye politike. Nuk ka sot një president të dytë që një ish-kryeministër, ish-president, ish-kryetar kuvendi që akuzohet dhe pretendohet për akuza shumë të larta të paproovuara, të qendrojë në një masë sigurimi ekstreme siç është kjo e arrestit me burg”, tha avokati Kujtim Cakrani.
Discussion about this post