Partia Demokratike u është përgjigjur komenteve të drejtorit të Kadastrës, Artan Lamen në lidhje me audio-përgjimin e publikuar vetëm pesë ditë para zgjedhjeve të 25 prillit, ku ai dëgjohej të udhëzonte vartësit për procesin e legalizimeve.
Në një postim në Facebook, Sekretari i Përgjithshëm Gazment Bardhi ka publikuar një video ku dëgjohet kryeministri Edi Rama që premton para zgjedhjeve të vitit 2013 se procesin e legalizimeve do ta drejtojë vetë. Më pas, jepet audio-përgjimi i Lames. Sipas Bardhit, kjo gjë tregon se administrate dhe legalizimet u përdorën për vota me urdhër të Ramës.
“Këmbëngulja e Artan Lames për t’i cilësuar shqiptarët si mish për top, është një tjetër provë se me urdhër të Edi Ramës, administrata dhe legalizimet janë përdorur për qëllime elektorale në masakrën zgjedhore. Këtë e thotë edhe raporti përfundimtar i OSBE/ODIHR, këtë e dinë mirë të gjithë shqiptarët që pas mashtrimit për legalizime falas, u përballën me dhunën dhe gazin lotsjellës me të cilin u dëbuan nga pronat e tyre. Ky krim zgjedhor, si një hallkë në zinxhirin e veprimeve korruptive dhe anti-demokratike, është një tjetër provë në duart e drejtësisë e cila nuk mund të mos veprojë, sidomos kur shkelësit e saj sfidojnë publikisht atë dhe shoqërinë shqiptare me qëndrimet e tyre anti-ligjore,”- shkruan Bardhi.
5 ditë para zgjedhjeve të 25 prilliut, gazetari Artan Hoxha publikoi një audio-përgjim ku tregohej si drejtori i Kadastrës, Artan Lame udhëzonte vartësit e tij në lidhje me procesin e legalizimeve. Gjatë përgjimit, Lame pohon se legalizimet janë një kosto e madhe elektorale, dhe në rast se banorëve iu hiqet drita jeshile, atëherë ikin votat, ndaj kërkon që kurrsesi, fjala “jo”, nuk duhet që t’ju thuhet qytetarëve. Lame tha se audio-përgjimi është i vërtetë por është i vitit 2017. Sot, në një prononcim, Lame tha se nuk do t’i hiqte asnjë fjalë asaj audioje.
