Pesë kampionatet kryesore të futbollit europian do shohin sot një pjesë të ndeshjeve më të rëndësishme të tyre.
E ndërsa do të ketë përballje mes më të fortëve, vëmendjen e tifozëve shqiptarë do e tërheqin lojtarët tanë që aktivizohen në skuadrat elitare.
Premies League do të ketë në raundin e dhjetë të saj mungesën e Armando Brojas, i cili nuk do të jetë pjesë e skuadrës së Southampton në ndeshjen kundër Watford, për shkak se është ende i dëmtuar.
I njëjti fat është edhe për Granit Xhakën që prej javësh tashmë vuan nga dëmtimi në gju dhe ende nuk është në gjendje që të rikthehet në fushë.
Në Ligue 1, për javën e 12 të kampionatit francez Lyoni i Xherdan Shaqirit do të ndeshet me ekipin e Lens. Shqiptari kaloi nga Liverpool te francezët gjatë merkatos së kësaj vere dhe deri më tani ka treguar një formë shumë të mirë dhe ka fituar vend të rëndësishëm në ekip.
Megjithatë kjo përballje do të jetë goxha e vështirë pasi ekipi i Shaqirit renditet në vendin e 9 me 16 pikë, teksa kundërshtarët e tyre të kësaj javë janë të dytët në tabelë me 21 pikë.
Nëse Berat Gjimshiti nuk do të ishte dëmtuar në kualifikuesen e Kombëtares me Hungarinë, ditën e sotme do të kishin një derbi shqiptarësh në Seria A.
Atalanta e mbrojtësit ‘Kuqezi’ do të përballet me Lazion e Strakoshës, Hysaj dhe Muriqit për raundin e 11 të kampionatit italian, ndërsa ende nuk dihet nëse tre shqiptarët do të kenë minuta në dispozicion në këtë sfidë.
Dy skuadrat kanë diferencë me vetëm një pikë, me Atalantën që qëndron në vendin e 5 të tabelës së Seria A me 18 pikë, ndërsa Lazio renditet i 6-i me 17 pikë.
Ndërsa Torino i Etrit Berishës do të ndeshet me ekipin e Sampdorias, me gardianin ‘Kuqezi’, të cilit nuk dihet nëse do i besohet ndonjë minutë aktivizimi.
Torino ndodhet në vendin e 13 me 11 pikë të grumbulluara në 10 takime, teksa kundërshtarët e tyre të sotëm janë në vend të 15 me 9 pikë./K.T/Gijotina.com
