Mbështetur në të dhënat nga Instituti i Statistikave, mbi “Lejet e Ndërtimit” në tremujorin e dytë të këtij viti, u dhanë 347 leje , një rritje me 66 % krahasuar me të njëjtën periudhë të vitit të kaluar, i cili regjistroi 209 leje.
Në tremujorin e parë të këtij viti, numri i lejeve të reja të dhëna fiksohet pranë 251 të tillave. Të njëjtin ndryshim ka pësuar edhe treguesi i sipërfaqeve të lejeve të ndërtimit, i cili vjen në rritje me 68.8% këtë tremujor nga 322 294 m2 i miratuar në 2020-ën në 544 127m2 gjatë këtij viti. Në tremujorin e dytë të vitit 2021 vlera e përafërt e leje të ndërtimit miratuar për ndërtesa dhe punime inxhinierike është 23.1 mld lekë duke shënuar po ashtu një rritje me 55.8%.
Lejet më të kërkuara kryesisht janë për ndërtesa me një kat ose me dy kate, por tendenca e ndërtimeve të reja prej vitesh është pozitive edhe në sektorin e biznesit. Nga të dhënat e marra në shqyrtim shohim se nga 347 leje gjithsej 252 janë dhënë për ndërtime rezidente dhe 95 janë dhënë për ndërtesa jo rezidente. Mes lejeve për ndërtesa jo rezidente, numrin më të madh të lejeve e regjistrojnë ndërtesat industriale, me 34 leje.
Nëse krahasojmë lejet e ndërtimit sipas qarqeve, shohim se për tremujorin e dytë të vitit 2021 qarku me më shumë leje është ai i Durrësit, i ndjekur nga kryeqyteti. Ky qark, jo vetëm që regjistron më shumë leje ndërtimi, por gjithashtu ka shënuar dhe rritjen më të madhe, krahasuar me të njëjtën periudhë të një viti më parë, me 270.4%. Në tremujorin e dytë të këtij viti janë dhënë 100 leje ndërtimi në këtë qark, nga 347 në total, ndërsa në tremujorin paraardhës, kjo shifër fiksohej në 44. Shtimi i lejeve të ndërtimit në bashkinë Durrës, vjen edhe për shkak të rindërtimit pas tërmetit.
Nga ana tjetër qarqet me numrin më të ulët të lejeve të ndërtimit rezultojnë qarku i Gjirokastrës, qarku i Lezhës, dhe i Kukësit me nga 4 leje ndërtimi secili. Ndërkohë, qarqet që kanë pësuar rënie të numrit të lejeve të ndërtimit në terma vjetorë janë Qarku i Lezhës, që ka dhe rënien më të madhe me 66.7%, Qarku i Shkodrës, i Gjirokastrës dhe i Dibrës.
