Lirim Zendeli është shqiptari i vetëm i cili ka arritur të garojë në nivelet më të larta të automobilizmit botëror, ku paraqitjet e tij të shkëlqyera në kampionait Formula 4, e katapultuan ate të garonte në Formula 2.
Formula 2 është hapi final i kalimit në garat që të gjithë ne njohim, atë të Formula 1 ku garojnë yje si Lewis Hamilton, Max Verstappen, Sebastian Vettel dhe shumë emra të tjerë të njohur.
Javë më parë, Zendeli bëri me dije lajmin e keq se ai ishte i detyruar të tërhiqej nga karriera e garimit në pistë, ku në një postim në profilin e tij zyrtar shkroi:
“Përshëndetje miqtë e mi. Fatkeqësisht kam disa lajme shumë të këqija. Unë po detyrohem të heq dorë shumë herët nga karriera ime. Unë nuk mund të vazhdoj të garoj në Formula 2 për arsye financiare. Pandemia ka reduktuar të ardhurat e mia që kisha mundësi të shpenzoja në këtë kampionat. Fillimisht dua të falenderoj sponsorat e mia nga Gjermania, që kanë qënë të mirëkuptueshëm, dhe nuk janë fajtorë për këtë ndërpreje të karrierës time. Veçanërisht Ajdini, të cilët kanë mbuluar të gjitha boshllëqet e mia financiare, që u krijuan nga persona të tretë të cilët nuk e mbajtën fjalën. Jam krenar që pata mundësinë të garoja në Formula 2, sepse vij nga një familje normale me të ardhura mesatare. Kam kuptuar që duhet të tërhiqem, në këtë moment që është shumë i vështirë për mua, dhe do të kërkoj çdo mundësi që unë të rikthehem ne pistë sa më shpejt të jetë e mundur”.
Në lidhje me këtë lajm, së fundmi kanë reaguar edhe grupimi ‘Tifozatkuqezi’ në profilin e tyre zyrtar në Instagram, ku i kanë bërë thirrje të gjithë personave dhe bizneseve sportdashës, qe të hedhin sytë edhe nga ky sport, për të mbështetur Lirim Zendelin në çdo formë që munden, në mënyrë që të vazhdojë të shkëlqejë në karrierën e tij.
Postimi i plotë i grupimit ‘Tifozatkuqezi’:
Discussion about this post