Presidenti Ilir Meta e ka quajtur trillim artikullin e gazetës zviceriane “Kronen Zeitung”, e cila shkruan se Meta ka lobuar 700 mijë dollarë për një foto në ceremoninë e inagurimit të ish Presidentit Amerikan Donald Trump.
Meta tha se nuk ka paguar asnjë qindarkë për foton, ndërsa shtoi se në Amerikë ka qenë me Petrit Vasilin pasi ishin ftuar nga organizatorët e ceremonisë.
“Çfarë komenti të kem unë për këto trillime, e kam parë atë shkrim pa emër, për presidentin e një vendi, nuk ka rëndësi se çfarë është ai. Janë disa shpifje dhe trillime të bëra më herët, për aq dijeni sa kam unë, në 2017 kam qenë kryetar Kuvendi dhe kryetar i LSI, për sa më takon mua, në 2018 gazetari i Fax News, Bledian Koka më ka pyetur për këtë çështje. Përgjigja ime ka qenë shumë e qartë, që unë dhe zoti Vasili kemi shkuar me ftesë të organizuesve të ceremonisë. Ata thonë që ka qenë Ilir Meta, dhe paska paguar 700 mijë dollarë për të bërë foto me Trump, nëse ju duket zoti Vasili si Trumpi në rregull. Nuk ka asnjë ceremoni më të sigurtë sesa ajo e betimit të presidentit të Amerikës, është shumë e qartë dhe e verifikueshme, as kam paguar dhe as do të paguaj asnjë cent për foto me presidentë, se i kam bërë që 30 vjeç. Nuk më duhej një foto me presidentin Trump. Po të mos isha president, unë nuk do ti kisha paditur. Ka garë të madhe mes avokatëve në Vjenë për të më përfaqësuar në këtë gjyq”, tha Meta.
Discussion about this post