Presidenti i Francës, Emmanuel Macron, ka vënë në dukje se është në favor të një takse ndërkombëtare të pasurisë që do të përdoret për luftën me ndryshimet klimatike.
Në një transmetim të drejtpërdrejtë në RFI, France 24 dhe Franceinfo, Macron bëri deklarata lidhur me Rusinë dhe Samitin e Paktit të Ri Financiar Global që do të përfundojë sot në Paris.
Macron u shpreh se me këtë samit nuk dëshirojnë vetëm të shpëtojnë planetin, por në të njëjtën kohë dëshirojnë të luftojnë me varfërinë dhe ndryshimet klimatike.
Më tej ai rikujtoi se bota po kalon në një moment “thyerjeje”, se dy vjet më parë në Paris Fondi Monetar Ndërkombëtar (FMN) vendosi t’u japë të drejta të veçanta tërheqjeje vendeve më të varfra dhe se në këtë kuadër në atë periudhë vendosën që të jepen rreth 100 miliardë euro.
Emmanuel Macron theksoi se do të krijojnë një fond për të ruajtur biodiversitetin dhe pyjet.
Presidenti Macron bëri të ditur se është në favor të një takse ndërkombëtare të pasurisë që do të përdoret për këtë qëllim.
Rusia, “fuqi destabilizuese” në Afrikë
Duke vlerësuar edhe mospjesëmarrjen e Rusisë në samit, Macron komentoi se Rusia është “fuqi destabilizuese” në Afrikë përmes milicëve privatë.
Ristrukturimi i borxhit të Zambias
Macron njoftoi se në kuadrin e samitit në Paris u ristrukturua borxhi i Zambias dhe se Senegali arriti marrëveshje në çështjen e transformimit të klimës.
Duke vënë në dukje se ky vend teksa vazhdon prodhimin me Partneritetin e Transformimit të Drejtë të Energjisë për Senegalin (JETP) mund të pakësojë emetimin e gazit serrë, Macron theksoi se Senegali ka premtuar që të rrisë në 40 për qind pjesën e tij të energjisë së rinovueshme deri në vitin 2030.
Dëshirojmë që vendet e mëdha në zhvillim të largohen nga energjia e qymyrit, tha Macron, i cili tërhoqi vëmendjen se disa vende në Evropë kanë rihapur centralet e tyre të karbonit.
Ndër të tjera, Macron u shpreh se vendet e hemisferës jugore përbëjnë mushkëritë e botës dhe janë në një pozicion rezervë për botën për sa i përket biodiversitetit.
Franca lëshon 1 për qind të gazit serrë në të gjithë botën, deklaroi Macron, duke shtuar se për sektorin e aviacionit, kjo normë është 3 deri në 4 për qind.
Pasi bëri të ditur se vendi i tij prodhon gjysmën e avionëve në botë, Macron tha se “Nëse arrijmë me sukses të dekarbonizojmë këtë sektor, mund të jemi kampion në dekarbonizimin e një sektori të tërë”.
Ndaj pyetjes së një gazetari se “Marrja e borxhit nga Kina, është një problem apo një kurth për vendet e varfra?”, Macron dha përgjigjen që “Po, nëse kapërcen një nivel të caktuar”.
Presidenti Macron bëri të ditur se qasja për të financuar ekonomitë e vendeve të Afrikës nuk bëhet tashmë në mënyrë të drejtë dhe shtoi se duhet të ristrukturohen borxhet e këtyre vendeve.
Discussion about this post