Presidenti amerikan Donald Trump ka njoftuar se zyrtarë të SHBA-së, Rusisë dhe Ukrainës do të takohen të premten në një konferencë sigurie në Mynih për të diskutuar mbi përfundimin e luftës në Ukrainë.
“Rusia do të jetë atje me njerëzit tanë,” tha presidenti amerikan. “Ukraina gjithashtu është e ftuar, por nuk dihet ende saktësisht kush do të marrë pjesë, por do të jenë njerëz të nivelit të lartë nga Rusia, Ukraina dhe Shtetet e Bashkuara.”
Megjithatë, Rusia, e cila nuk është pjesë zyrtare e forumit vjetor në Gjermani nuk ka komentuar mbi këtë zhvillim, ndërsa një zyrtar i lartë ukrainas deklaroi se “nuk priten bisedime me rusët në Mynih.” Aleatët e NATO-s ende po reagojnë ndaj njoftimit surprizë të Trumpit se ai dhe presidenti rus Vladimir Putin kishin rënë dakord gjatë një telefonate për të nisur bisedimet për përfundimin e luftës.
Presidenti ukrainas Volodymyr Zelensky pritet të takohet në Mynih me nënpresidentin e Trumpit, JD Vance, si dhe me Sekretarin Amerikan të Shtetit, Marco Rubio. Megjithatë, udhëtimi i Rubio-s ka pasur probleme, pasi avioni i tij u detyrua të kthehej në një bazë ajrore amerikane për shkak të një problemi teknik.
Trump e bëri njoftimin për takimin trepalësh gjatë një konference për shtyp të enjten, por nuk dha detaje të mëtejshme. Nga ana e tij, këshilltari i Zelensky-t, Dmytro Lytvyn, u shpreh se delegacioni ukrainas nuk ka në plan të marrë pjesë në një takim të tillë.
Trump e bëri njoftimin një ditë pasi zhvilloi telefonata të ndara me Putinin dhe Zelenskyn. Ai i përshkroi bisedimet si “të shkëlqyera” dhe tha se ka një “mundësi të mirë” për t’i dhënë fund luftës së përgjakshme.
Por deklaratat e tij kanë shkaktuar shqetësime në Ukrainë dhe Europë. Trump u shpreh se anëtarësimi i Ukrainës në NATO nuk është “praktik” dhe se kthimi i saj në kufijtë para vitit 2014 është “i pamundur.”
Zelensky pranoi se nuk i pëlqente fakti që Trump foli më parë me Putinin sesa me të dhe paralajmëroi se Ukraina nuk do të pranojë asnjë marrëveshje pa përfshirjen e saj direkte. “Ne nuk mund ta pranojmë këtë si një shtet i pavarur,” theksoi ai, duke kërkuar garanci sigurie nga SHBA.
Ndërkohë, në Europë po rritet frika se lëvizjet e Trump mund të çojnë në një marrëveshje dypalëshe mes SHBA dhe Rusisë, duke anashkaluar interesat e Ukrainës dhe Europës. Presidenti francez Emmanuel Macron theksoi se vetëm Zelensky mund të negociojë për llogari të Ukrainës, duke paralajmëruar se “një paqe që është një kapitullim” do të ishte “lajm i keq për të gjithë.”
Shefja e diplomacisë së BE-së, Kaja Kallas, paralajmëroi se “çdo zgjidhje e shpejtë është një marrëveshje e pistë.”
Në Mynih, Zelensky synon të sigurojë mbështetjen amerikane për Ukrainën, ndërsa qëllimet e administratës Trump mbeten të paqarta. JD Vance mund të përpiqet ta sigurojë Zelenskyn se Ukraina do të jetë pjesë e negociatave, edhe pse duket se do të ketë një rol dytësor.
Por ai mund të përcjellë gjithashtu një mesazh të ashpër – të njëjtin që Sekretari i Mbrojtjes, Pete Hegseth, dha këtë javë përpara se të korrigjonte qëndrimin e tij: SHBA nuk e sheh Ukrainën si anëtare të ardhshme të NATO-s dhe për t’i dhënë fund luftës, ajo mund të detyrohet të heqë dorë nga territore të pushtuara nga Rusia.
Një skenar i tillë do të ishte i vështirë për t’u pranuar nga Zelensky, por mbështetja amerikane për ndihmë ushtarake duket gjithnjë e më e pasigurt. As Trump dhe as republikanët në Kongres nuk shprehin më ndonjë interes për ta vazhduar atë.
Discussion about this post