Sa herë vjen stina e vjeshtës bahçet shkodrane veshin petkun e saj plot nure dhe nuanca, ku askund si në Shkodër nuk e gjen këtë harmoni drite dhe arome të këndshme që kundron prej së largu.
Akoma më përrallore këtë atmosferë e bën shpirti artistik i shkodranëve, të cilët lindin dhe jetojnë me këtë harmoni stinore e ku zemrat ua çon peshë mbretëresha e bahçeve dhe e këngës, “Lulebora”.
Prej pesë vitesh në Shkodër organizohet “Festivali i këngës qytetare “Luleborë”, një traditë e kthyer pas rreth 30 vitesh mungesë.
Në kuadër të ruajtjes dhe zhvillimit të mëtejshëm të kësaj tradite, Bashkia Shkodër organizon këtë vit edicionin e gjashtë të Festivalit të Kangës Qytetare “Luleborë”.
Festivali “Luleborë” ka si qëllim të risjellë tek publiku këngën qytetare, me motive shkodrane, duke i dhënë një dimension të ri asaj, duke nxitur profesionalizmin dhe nivelin e lartë artistik, përmes interpretimit live të çdo elementi të këtij festivali.
Festiali “Luleborë” do të zhvillohet këtë vit në datat 29 dhe 30 tetor 2021, në Teatrin “Migjeni”.
