Trajneri i skuadrës së Egnatias, Gugash Magani ka theksuar se ka mbetur i pakënaqur me rezultatin ndaj Skënderbeut. Ai gjithshtu ka vendosur në pah faktin që gjatë javës nuk e ka patur të plotë grupin e lojtarëvë për shkak të dëmtimeve.
”Unë mendoj që skuadra sot shpalosi gjërat e veta, dhe pse gjatë javës kishim probleme me dëmtimet. Ka shumë konkurrencë, dhe mendoj se dhe pse me shumë mungesa nuk u vunë re. Shënuam një gol shumë të bukur, një moment hutimi, diçka që nuk duhet të ndodhë pësuam gol. Në pjesën e dytë patëm disa pauza, në 10 minutat e para ishim mirë, ndërsa u ndje lodhja tek disa lojtarë që nuk janë në gjendjen e duhur. Sot duhet të fitonim dhe mund a fitonim me rastet që patëm. Rëndësi ka që skuadra po konsolidohet, dhe ne nuk jemi të vegjël, jemi ndërtuar për të arritur objektivat tonë. Respektuam kundërshtarin nuk e nënvlerësojmë, sepse ka histori.
Pretendimet për penallti? Unë mendoj që ishte penallti, është diçka që gjyqtari ka gabuar rëndë. Arbitri hezitoi, unë nuk merrem me këtë pjesë. Mendoj që në disa momente na frenoi në disa veprime që ishin shumë të mira për ne. Kolegut tim nuk i thashë asgjë, i thash Memellit thuaj lojtarëve të mos provokojnë, Memellin e kam pasur futbollist. Nuk dua të merrem me alibi merrem me skuadrën time.
Ne gabuam te rasti i pësimit të golit, ka skuadra që shënojnë, por mund të marrim dhe dy gola për dy minuta. Kemi lojtarë me eksperiencë dhe pse nuk janë në gjendjen e duhur. Do ta tregojmë veten në dy tre javët në vazhdim. Mendoj se sot duhej të fitonim ashtu siç shkuan gjërat në fund.
Skenat pas ndeshjes? Janë gjëra që nuk duhet të ndodhin, janë nerva loje. Në nerva loje kam parë shumë koleg të mi që janë më të mëdhenj dhe në Serinë A të veprojnë ashtu. Nuk dua të krijoj asnjë lloj alibie, ne do t’i hapim punë çdo skuadre nuk jemi të vegjël, si në Rrogozhinë dhe jashtë saj. Do të shikoni surpriza të bukura”, u shpreh Magani.
