Gugash Magani nuk merret me rezultatin dhe sidomos në të parën miqësore. Ai vlerëson angazhimin e të tijve, por thekson se nuk është koha për të dalë në konkluzione.
Gjatë një deklarate të dhënë enkas për “Panorama Sport”, numri një i pankinës së Lushnjës tha:
“Ndeshje të tilla kanë vlerë, por jo për të parë rezultatin. Shërbejnë për harmonizimin e skuadrës.
Pastaj kur përballë ke Bylisin, është edhe më mirë. Luajtëm me një ekip të mirë dhe kuptuan se ku jemi me gjendjen dhe punën tonë.
Ekipi është në rrugë të mbarë. Kemi mbyllur vetëm dy javë stërvitje dhe jemi në ndërtim e sipër.
Jam i bindur që do të jemi edhe më mirë, pasi lojtarët do të kenë rritje të performancës në vijim”.
Nuk kishte si të mos fliste për merkaton dhe pretendimet. Peqinasi evidentoi se po pret ende afrime, të cilat do ta forcojnë edhe më shumë Lushnjën.
“Po presim afrimet të tjera. Këtë e kam thënë edhe më herët. Kur të plotësohemi totalisht, them se do të kemi atë Lushnjën që ne të gjithë e duam dhe sidomos tifozët.
Synimi është që t’i kënaqim ata. Do të vazhdojmë të punojmë me tërë kapacitetin dhe kohën që kemi në dispozicion”, përfundoi Magani./panorama
Discussion about this post