Majlinda Cara hedh 140 mln lekë për asfalt, fiton pa garë Agim Kola

Kryebashkiakja e Kurbinit, Majlinda Cara, po shpenzon miliona lekë për propagandë me asfaltimin e rrugëve. Tani që po afrojnë zgjedhjet, po kujtohet Cara se duhet të kryejë disa investime në bashkinë që drejton. Në fakt, kryetarja po merret vetëm me arnime rrugicash me prokurime korruptive. Këtë e tregon kontrata e fundit e firmosur nga dora e saj.

Bëhet fjalë për tenderin me objekt  “Asfaltim, rehabilitim i rrugës Ferrtrash Fushë-Mamurras, Bashkia Kurbin”. Kjo është një rrugica që lidh këtë zonë periferike me qytetin e Mamurrasit. Dhe vetëm për pak asfalt që do të hedhë në të, Cara do të shpenzojë  140 milionë lekë. Afera e radhës kjo, nga disa tenderë për rrugica që ka nënshkruar Caran në këto javët e fundit.

Sikur të mos mjaftonin miliona lekë që po ikin për një rrugë fshati, Majlinda e ka mbyllur kontratën në shkelje të ligjit. Open Data Albania i ka dhënë “flamurin e kuq” për shkak se nuk është zhvilluar një garë komfort rregullave ligjore.

Në dokumente tregohet se për këtë projekt kanë paraqitur oferta 11 kompani. 10 prej tyre janë skualifikuar pa arritur të futen në garë. Dhe është lënë si konkurrente e vetme firma “COMPANY RIVIERA 2008” SHPK, në pronësi të Agim Kolës.

“Riviera” e mori tenderin pa u lodhur fare edhe pse të paktën tri kompani të tjera kishin paraqitur oferta shumë më të lira. Kjo përbën një tjetër shkelje nga Cara. Konkretisht kryetarja e Bashkisë ka mbyllur tenderin me ofertën më të shtrenjtë dhe pa garë.

Kush është Agim Kola

Përmendim këtu se abuzim është edhe fakti që tenderi i është dhënë një biznesmeni si Agim Kola, i njohur për abuzimet me tenderët e rrugëve. Konkretisht kompania është e ndarë në aksione për 4 ortakë të familjes Kola. Por, themeluesi dhe pronari i vërtetë i saj është Agim Kola.

Ky i fundit zotëron edhe dy firma të tjera. Bëhet fjalë për RSM Company SH.P.K. dhe A. N. K. Shpk, përmes të cilave ka fituar më shumë tenderë, të gjitha në shkelje të ligjit. A. N. K. Shpk njihet më së shumti për megavjedhjen që bëri me punimet ne aksin Milot-Balldren.

Bëhet fjalë për koncesionin me vlerë 255 milionë euro, nga të cilat 213 milionë euro vlera e projektit dhe pjesa tjetër TVSH. Firma RSM Company SH.P.K është një nga ato që fiton çdo tender për sinjalistikat rrugore, të cilat gjithmonë merr fondet sipër vlerës 10  milionë lekë.

Lexzo edhe: Kryebashkiaku flet me superlativa: Bajram Curri, ndër qytetet më të mira në Shqipëri