Situata shëndetësore e Romelu Lukakut ka sjellë shqetësim në rradhët e ekipit të Interit. Ky sezon paraqitet tepër i vështirë për sulmuesin belg. Kjo pasi dëmtimet e tij po kthehen në makth. Të fundit ai e kishte pësuar në gju gjatë ndeshjes kundër Monzës. I sapo rikthyer në fushë, Lukaku parkoi menjëherë në infermieri, vijon punën i diferencuar me shpresën për të qenë gati për sfidën kundër Milanit, në finalen e Superkupës.
Në këtë rikthim të tij në Milano, Lukaku ka treguar se është shumë larg formës së tij më të mirë, muskujt e tij duken të brishtë ndërsa rikuperimi në çdo rast ka qenë i ngadaltë.
Stafi drejtues zikaltër ka nisur të bëjë edhe një herë llogaritë, pasi kjo gjendje e Lukakut nuk ofron garanci për të ardhmen, shtyrja e huazimit për një tjetër vit është vënë ndjeshëm në pikëpyetje. La Gazzetta dello Sport shtron se Inter, përpara se të futet në negociata me Chelsea, do të mendohet mirë duke parë dëmtimet e shpeshta që Lukaku ka pësuar.
Discussion about this post