“Desha të bëj vaksinën Pfizer se më kanë thënë fëmijët që është më e mira, por po iki se më thanë që nuk ka,” tregon Xhenafizja një grua 50-vjecar që del nga stenda e vaksinimit në sheshin “Skënderbej”.
Njëjtë si 50-vjecarja janë edhe shumë të tjerë, që vijnë edhe kthehen mbrapsht pasi duan ta ri-mendojnë se cilën vaksinë do të kryejnë.
“Të kisha marrë Pfizerin se unë jam me sëmundje kronike, po këta më thanë që nuk kanë këtu e do të shkoj njëherë atje tek stadiumi i madh,” thotë një tjetër qytetar që kalon pranë stendës.
Po kush mund të bëjë vaksinën Pfizer që e kërkojnë të gjithë?
Në të dyja qendrat e vaksinimit që Gazetasi.al vëzhgoi, Pfizer mund të bëhej për persona të autorizuar dhe të përcaktuar në listë paraprake.
“Mua më tha doktori që do të bëj Pfizer, vij këtu e më thonë që janë ato dy të tjerat. Unë nuk kam fuqi të bredh në vapë, jam edhe i sëmurë,” thotë Selimi një 64 vjeçar.
Ministria e Shëndetësisë ka thënë më herët për Gazetasi.al se qytetarët vaksinohen në bazë të rekomandimit të mjekut të familjes, por nga ana tjetër që prej hapjes së fashës së moshës +50, qytetarët janë udhëzuar se mund të shkojnë direkt në qendrën e vaksinimit me kartë identiteti.
“Po ku shkojnë këto vaksina që nuk ka. Për Pfizer kam ardhur dhe e dëgjova dje në televizor që erdhën mbi 67 mijë doza” thotë me zë të lartë një tjetër qytetar i irrituar pranë qendrave të vaksinimit.
Qytetarët që presin në radhë në qendra, udhëzohen nga regjistruesit se duhet të zgjidhnin të bënin vaksinën AstraZeneca dhe atë të Sinovac dhe nëse ata kërkojnë vaksinën Pfizer u thonë nuk ka. Gazetasi.al këtë problematikë me vaksinën Pfizer e ka trajtuar edhe më herët kur qytetarë me sëmundje kronike kanë dërguar ankesa pranë redaksisë sonë se nuk mund të bëjnë vaksinën Pfizer edhe pse e kanë të rekomanduar nga doktori.
Burime në ISHP për Gazetasi.al treguan se deri muajin e shkuar janë administruar më së shumti vaksina të Coronavac, me numrin 586 352 doza, ndërsa vaksina të tjera janë administruar përkatësisht:
-146 880 doza vaksine PfizerBioNtech-Comirnaty.
-188 038 doza vaksine AstraZeneca.
-40 728 doza vaksine Sputnik V.
Ndërkaq që prej fillimit e deri më tani për sa i përket vaksinën Pfizer kanë ardhur rreth 200.000 doza, ku një sasi e fundit u lajmërua edhe dje nga Ministrja e Shëndetësisë Ogerta Manastirliu, në rrjetin social “Facebook”.
Janë të shumtë ata që i shkruajnë Ministres në faqen e saj se “ku shkojnë” vaksinat Pfizer.
Gazetasi.al kërkoi informacion në ISHP për administrimin e vaksinës Pfizer dhe i komunikuan se “për vaksinën Pfizer qytetarët duhet të lidhen me mjekun e familjes dhe ata i listojnë në varësi të sasisë që kanë”.
Ndërkaq Ministria e Shëndetësisë njëjtë si vendet e tjera në rajon duhet të informojë qytetarët për administrimin e dozave të vaksinës në mënyrë që ata të shkojnë në qendrat e vaksinimit për t’u vaksinuar dhe jo për t’u kthyer mbrapsht/Gazeta “Si”
