Ministrja e Shëndetësisë Ogerta Manastirliu ka deklaruar nga foltorja e Kuvendit se ashtu si në të gjitha vendet europiane, edhe në Shqipëri do të vendoset ‘GreenPass’ për të hyrë në lokale dhe në strukturat e shërbimit.
“Si hyhet në një restorant, bar, në Europë. A futet me ‘GreenPass’? Po, do e vendosim dhe ne, e vendosëm dhe në universitete. Për qytetarët është e rëndësishme, që ne kemi pika vaksinimi në çdo qendër shëndetësore, dhe në universitete. Do të vendosim ‘GreenPass’ për të hyrë në lokale dhe në strukturat e shërbimit”, është shprehur ministrja.
Kujtojmë se certifikata e vaksinimit ‘GreenPass’ është detyrueshme në shumë vende të Europës për mësuesit, profesorët, teknikët, administratorët e shkollave dhe universiteteve por gjithashtu dhe në polici, ushtri dhe diplomatë.
Edhe ata që kanë kontrata të jashtme me administratën publike do të duhet të tregojnë pasaportën e gjelbër për të hyrë në një vend pune, për të kryer trajnime ose veprimtari vullnetare.
Më herët, pasja e certifikatës ‘GreenPass’ u bë e detyrueshme në vendin tonë edhe për studentët apo pedagogët në universitet, vendim që shkaktoi debate dhe pakënaqësi të shumta.
Discussion about this post